Nga Blendi Gashi
Plotësim ndryshimi i ligjit për veteranët e UÇK-së, ashtu edhe siç pritej ka përplasur keq mazhorancën dhe opozitën, por jo vetëm.
E gjitha ka ndodhur për shkak të ndarjes së veteranëve në tre kategori.
Ndërsa kryeministri dhe kryekuvendari u munduan ta shesin si ligj që mbron vlerat çlirimtare dhe shpagim ndaj atyre që sakrifikuan për çlirimin e vendit, opozita dhe deputet të caktuar të mazhorancës e ngritën fuqishëm zërin duke kundërshtuar kategorizimin e veteranëve, duke e quajtur se me ligjin e ri vetëm sa mund të rriten pakënaqësitë.
Deputetët kanë dhënë kritka edhe për datën kur është formuar UÇK-ja që sipas ndryshimeve të ligjit i bie që është themeluar në vitin 1991.
Opozitarët kritika drejtuesve të veteranëve
Seanca u tensionua dhe u ndërpre për pesë minuta kur fjalën e mori deputetja e VV-së, Aida Dërguti, njëherit ish ushtare e UÇK-së, e cila tha se përfaqësuesit e shoqatave të veteranëve nuk e mbrojnë zërin e të gjithë luftëtarëve, dhe sipas saj ata marrin për vete nga 250 euro, kurse nuk e qajnë kokën për luftëtarët tjerë.
Ky fjalim bëri që të reagoi ashpër kreu i veteranëve të UÇK-së Hysni Guncati i cili gjindej lartë në sallën plenare, derisa u dëgjua t’i deputetës “ulu atë gisht aty…arre duhet me të ardh…”.
Por Dërguti vazhdonte ta pyeste se a i merr 250 euro dhe a bën pjesë në kategorinë e parë, ndërsa i thoshte “ulu, mos u thirrë në emër të Adem Jasharit”, pasi siç duket Guncati gjatë reagimit të tij ka përmendur dhe emrin e komandatin legjendar.
“Kush është UÇK-ja e vitit 1991”?
Drejtuesit e veteranëve i kritikoi ashpër edhe deputeti i AAK-së, Daut Haradinaj duke thënë se ata kanë rënë pre e mashtrimeve.
“Kanë gabuar përfaqësuesit e shoqatave të luftës që kanë rënë në ndikim të kujtdo. Për mua prej sot këta njerëz nuk janë përfaqësues. Nuk më përfaqësojnë mua”, tha ai.
Sa i përkdet ndryshimeve të bëra në ligj, Haradinaj tha se koalicioni qeverisës po mashtron veteranët dhe njëherit dhe po fut thika në mes ish-pjesëtarëve të luftës së UÇK-së.
“Kush është UÇK-ja e vitit 1991? Kush dreqin janë ata njerëz? Nuk ka pasur Ushtri Çlirimtare të Kosovës në atë kohë. Nuk ka pasur. Ka pasur njerëz që kanë sakrifikuar, por nuk ka pasur çka po thuhet. Ne mund të bëjmë ligje të veçanta për të gjitha kategoritë që kanë sakrifikuar, por duhet që të jemi të saktë. Ky kategorizim do të shkaktojë përçarje në popull dhe si i tillë është krejt i papranueshëm, sepse nuk mund të ndahen në të tilla grupe pjesëmarrësit e luftës.
Kush janë ata njerëz që mund të na tregojnë cilët janë veteranë të vitit 1991, cilët të vitit 1998 dhe 1999. Krejt palidhje. Kjo gjë nuk ndodhë askund në botë. I kanë gënjyer veteranët se do të rritet paga për ta. Ju siguroj se ata që do t’i marrin 250 euro nuk do të jenë më shumë se 100 persona në krejt Kosovën”, tha Haradinaj.
Ai u ka bërë lutje deputetëve që të mos e votojnë këtë ligj, derisa ka shtuar se edhe FMN-ja duhet të kuptojë se nuk mundemi me ju nënshtrua.
Haradinaj ka theksuar se nëse ka pasur matrapazë që janë fut në listat e veteranëve duhet larguar.
“Nëse Anton Quni e Adem Grabovci me bashkëluftëtarë pajtohen me këtë ligj atëherë edhe unë do të votoj pro”, ka thënë Haradinaj.
Kategorizimi i veteranëve, e ka zemëruar edhe deputetin e VV-së, Rexhep Selimin. Ai këtë ndarje e ka quajtur të padrejtë, duke thënë se asnjë pjesëmarrës në luftë nuk i ka pasur tre apo pesë shpirta.
“Është i pa drejtë kategorizimi i veteranëve në paga ose pensione në këtë rast. Sepse cili prej veteranëve ka pas 2 shpirte, ose tre, që të kategorizohen sot në tre kategori, kushdo që ka ardhur në luftë ka pasur një shpirë, ndani ata që kanë ardhur me vdekë në luftë edhe ata që pjesëmarrjen në luftë e kanë pasur par time. Herë kanë ardhur në luftë e here kanë ikur e përfundimi i luftës nuk i ka zënë në Kosovës”, tha Selimi.
“Avazi i keqpërdorimeve do të vazhdon”
Ndërsa, dy deputetët e LDK-së, Anton Quni dhe Armend Zemaj pohuan se ligji ka disa mangësi që mund të çojë vetëm në rritjen e pakënaqësive mes veteranëve.
Quni tha se me ndryshimet që janë bërë në ligj nuk trajtohet as Ministria e Mbrojtjes, Ministria e Brendshme, mbrojta territoriale etj.
Quni kërkoi të pastrohen listat nga veteranët e rrejshëm dhe numri real i veteranëve sipas tij nuk do ta lëndonte buxhetin.
Kurse, Zemaj, tha: “Kjo ndarje është e qëllishme. Anashkalimi i strukturave nuk ndodh në asnjë vend tjetër. Vetëm në Kosovë nuk përfshihen ata që me unfiormë dhe komanda te ndryshme nuk përfshihen, si forcat mbrojtëse, Minsitria e Brendshme, mbrojtja territoriale. Avazi i keqpërdorimeve do të vazhdon me këtë kategorizim”, pohoi Zemaj.
Ndërsa, në fillim të seancës kryeministri Isa Mustafa paralajmëroi deputetët se nëse Kuvendi nuk miraton ndryshimet e ligjit për veteranët, atëherë Kosova rrezikon të humb mbi 100 milionë euro fondet nga Fondi Monetar Ndërkombëtar (FMN).
Kurs,e kryeparlamentari, Kadri Veseli tha se ndryshimet që janë bërë në ligj eliminojnë mangësitë e ligjit paraprak dhe krijon hapësirën e mjaftueshme ligjore për një trajtim meritor të veteranëve.
“Përmes këtij ligji ne riafirmojmë vlerat e luftës sonë çlirimtare, përkushtimin, mundin dhe sakrificën e mijëra burrave e grave të Kosovës për liri, pavarësi dhe shtet të pavarur e sovran. Ky ligj është ligj i dinjitetit të veteranit të Ushtrisë Çlirimtare të Kosovës. Duke miratuar së bashku këtë ligj, ne hedhim poshtë të gjitha pretendimet që synojnë të denigrojnë figurën e veteranit të luftës çlirimtare, të gjitha pretendimet që e vendosin veteranin e UÇK-së në kategorinë e lëmoshës, apo të barrës fiskale për buxhetin e shtetit”, tha Veseli.
Ja tre kategoritë e veteranëve:
Kategoria e parë, Veterani luftëtari UÇK-së, i mobilizuar në luftë nga viti 1991 deri më 5 mars 1998 dhe ka qenë aktiv deri në ditën e përfundimit të luftës.
Kategoria e dytë, Veterani luftëtari UÇK-së, i mobilizuar në luftë nga luftë pas datës 5 mars 1998 dhe ka qenë aktiv deri në ditën e përfundimit të luftës.
Kategoria e tretë, Veterani luftëtar UÇK-së, i mobilizuar në luftë pas datës 31 mars 1999 dhe ka qenë aktiv deri në ditën e përfundimit të luftës, si dhe Veterani luftëtar UÇK-së, i mobilizuar në luftë nga viti 1991, përkatësisht pas 5 mars 1998, por që nuk ka qenë aktiv deri në ditën e përfundimit të luftës.
Pensioni mujor i veteranit luftëtar, sipas kategorive:
Kategoria e parë, 250 euro
Kategoria e dytë, 170 euro
Kategoria e tretë, 120 euro
Pas aprovimit dhe hyrjes në fuqi të këtij ligji, veteranët e luftës së UÇK-së, do të kenë drejtë të punojnë, por në atë rast nuk do ta gëzojnë pensionin e plotë por vetëm në 50% të shumës së paraparë sipas neni 16 të këtij ligji. /tesheshi.com/
