Kryeministri Rama paralajmëroi sanksione të ashpra, sidomos ndaj privatëve, me ligjin e ri të Emergjencave Civile, prezantuar së bashku me reformën e re strukturore nga Ministria e Mbrojtjes.
“…nuk duhet të presim t’i hapim gropën vetes kur vjen furtuna”, tha Rama.
“Do të ketë sanksione të qartë për cdo institucion apo subjekt privat. Nuk mund dot që në përditshmëri t’i hapim gropën vetes e pastaj kur vjen furtuna t’i kërkojmë shtetit të në nxjerrë nga gropa. Nuk mund dot t’i bien shkurt duke këputur kanalin e shkarkimit të ujërave për të bërë një hyrje me palma në lokal dasmash, e pastaj ankohemi pse shteti na prishi dasmën kur erdhi furtuna. Njësitë e qeverisjes vendore nuk mund të mos jenë të papërgjegjshme njësoj si një pronar i një lokali dasmash”, theksoi i pari i qeverisë.
Edhe sipas kreut të Emergjencave Civile Haki Çako, njeriu ka përgjegjësinë e tij të madhe në raste fatkeqësish.
“Prej krijimit të njerëzimit dhe deri më sot, pasojat më të mëdha kanë qenë nga përballja me fatkeqësitë natyrore. Por na duhet të theksojmë se edhe faktori ‘njeri’ është gjithashtu i rëndësishëm dhe ka ndikimin në ndodhjen e katastrofave natyrore. Kemi pasur situata të ndryshme nga faktkeqësitë natyrore por edhe nga ndërhyrja pa kriter e njeriut”, tha Çako. /tesheshi.com/
