Sektori i pronës do t´i nënshtrohet një reforme të thellë, e cila do të synojë përmbylljen tërësore të proçesit të legalizimeve dhe gjetjen e zgjidhjeve ligjore për objektet për të cilat ligji aktual nuk lejon përfundimin e proçesit.
Kështu deklaroi kreu i ALUIZNI-z, Artan Lame, duke paralajmëruar në këtë mënyrë ndryshimin e ligjit që do të mundësojë legalizimin e të gjitha objekteve të ndërtuara, të cilat aktualisht kanë mbetur pezull.
Në 4 vitet e fundit, sipas Lames, janë legalizuar 144154 legalizime, ndërkohë që në periudhën 2005-2013, kjo shifër ishte 21 mijë.
Nga rreth 323 mijë objekte që presin legalizimet, ligji aktual lejon përfundimin e proçesit për rreth 160 mijë objekte, ndërsa për pjesën tjetër duhen bërë ndryshime në draftin aktual.
Në lidhje me ecurinë e proçesit të legalizimeve, Artan Lame tha se në sistem ishin 320 mijë objekte, ndërkohë që për 306 mijë ka përfunduar verifikimi në terren.
Përsa i takon legalizimit të pallateve, një problem madhor, për shkak të kompleksitetit të çështjes, Lame tha se proçesi po ecën dhe gjithçka do të zgjidhet.
Veçanërisht në Tiranë, pallatet e ndërtuara pa leje apo me shtesa katesh mbi atë të dhënë nga autoritetet, përbënin një problem të veçantë për faktin se hyrjet ishin shitur, ndërsa firmat e ndërtimit kishin braktisur proçesin e pajisjes me dokumentet e pronësisë të blerësve. /tesheshi.com/
