Kampionët në fuqi të Paris Saint-Germain-it nuk gjejnë dot një rival për titull në kampionatin francez. Skuadra e drejtuar nga Laurent Blanc arriti mbrëmë fitoren e 17-të, pasi mposhti pa shumë telashe 2-0 Bastia-n, e kësisoj mban vendin e parë në klasifikim, me 22 pikë më shumë se vendi i dytë, që i përket Monaco-s.
Golat e realizuar nga Thiago Motta dhe Maxwell në minutën e 29-të dhe të 39-të mjaftuan për parizienët që të kalojnë një fundjavë të qetë e të shpenguar. Humbja e parë për ta në kampionat duket se është ende larg, e krahas asnjë humbjeje deri tani, domethënëse janë golat e shënuar e të pësuar nga PSG-ja: 50 gola të shënuar e 9 të pësuar në njëzet javë.
Përkundër rasteve të shumta të krijuara në vazhdimin e ndeshjes, vendasit nuk arritën të realizonin më tepër. Fokusi në pjesën e dytë të takimit u zhvendos tek futbollisti argjentinas Javier Pastore, i cili u rikthye në fushë pas dy muajve jashtë saj për shkak të një dëmtimi. /tesheshi.com/
