Real Madrid-i tregoi dy fytyra të ndryshme në Ukrainë përballë nikoqirëve të Shakhtar Donetsk-ut, që e vunë në dyshim triumfin e madrilenëve ndërsa këta ishin në epërsi 0-4. Tre gola të pësuar në më pak se 10 minuta e kanë bërë të vuajë skuadrën e Rafael Benitez-it, që nuk po mund të lirohej nga ankthi i “El Clasicos”, mirëpo së paku në fund ia doli të triumfojë, duke fituar 3-4.
Kështu, Real Madrid-i rezervon pozitën e parë në grupin A, pavarësisht rezultatit në ndeshjen e fundit ndaj Malmo-es, skuadrës që u mposht thellë në shtëpi nga PSG-ja, 0-5.
Punët janë më të komplikuara në grupin B, sidomos pas barazimit 0-0 në shtëpi të Manchester United-it ndaj PSV-së dhe fitores 0-2 të Wolfsburg-ut në udhëtim ndaj CSKA Moskva-s. Tani grupi kryesohet pikërisht nga gjermanët e Wolfsburg-ut, që ndeshjen e fundit presin “djajtë” nga Manchester-i, ndërkohë që PSV-ja do ta kërkojë kualifikimin në shtëpi përballë rusëve të CSKA-së.
Atletico Madrid-i kryen detyrën përballë turqve të Galatasaray-it (2-0), për të marrë kështu kryesimin në grupin C. Benfica nuk ia doli që nga udhëtimi në Kazakistan të kthehej me më shumë se një pikë, duke barazuar 2-2 ndaj Astana-së. Atletico Madrid-i dhe Benfica kanë siguruar kualifikimin, ndërsa Galatasaray-i dhe Astana do të luftojnë në javën e fundit për një vend për në Ligën e Europës.
Juventus-i duket se e ka për zemër skuadrën angleze Manchester City, pasi e mposhti edhe në ndeshjen e dytë në fazën e grupeve. Sërish me një rezultat minimal, por kësaj radhe 1-0, që vlen për të marrë maksimumin nga kjo ndeshje, e cila i dërgon italianët në kreun e klasifikimit. Borusia Moenchengladbach-u ka triumfuar në shtëpi ndaj Sevilla-s, (4-2), për të rrëmbyer pozitën e tretë, që të dërgon drejt aktivitetit tjetër europian, Europa League-s. /tesheshi.com/
