Duelet e fazës së grupeve në Ligën e Kampionëve vazhdojnë edhe të mërkurën mbrëma me ndeshje mjaft interesante. Juventus-Sevilla luajnë sfidën e mbrëmjes në grupin D, në të cilën do kërkojnë me çdo kusht pikët që do i mbanin në kreun e tabelës. Borusia Monchengladbach do jetë sfida të cilën duhet ta kalojnë futbollistët e Manuel Pellegrinit, për të vërtetuar epitetin e favoritit të grupit.
Trajneri i Juventusit, Masimiliano Allegri e ka të qartë filozofinë e lojës të cilën do e aplikojë me spanjollët e Sevillas. Për dallim nga ndeshja e parë në Angli ndaj Manchester City-t, për këtë duel italianët do luajnë me tre sulmues.
“Ne kemi kualitetin e duhur për të ofruar një ndeshje të madhe. Prandaj do të luaj 4-3-3. Ne kemi lojtarë të rinj në ekip dhe kemi nga data 10 shtator që stërvitemi bashkë. Duhet të mësohemi të luajmë me dy sistemet. Aktualisht nuk jemi në gjendje të mbyllim ndeshjen që në minutën e 60-të. Ne nuk kemi ende lojtarë që të përballojnë stresin fizik dhe psikologjik në këtë kalendar kur zhvillojmë një ndeshje për tri ditë. Vjet u shpallëm nënkampion Europe. Këtë vit, së pari, synojmë të kalojmë fazën e grupeve pastaj do shohim”, u shpreh Allegri.
Në grupin A, Real Madrid viziton Malmon në Suedi. Është folur shumë këto ditë për fushën e zvogëluar të Malmos. Të paktën me një metër, kanë ndryshuar dimensionet e fushës. Por, kjo nuk paraqet aspak problem për teknikun e madrilienëve, Rafael Benitez.
“Ndeshja me Malmon është si çdo ndeshje tjetër për Real Madridin në Ligën e Kampionëve. Është kërkesë ditore e klubit për të fituar secilën ndeshje. Ne kemi nevojë të ngremë efektivitetin e lojtarëve tanë në repartin e sulmit. Cristiano Ronaldo është një garanci për golin dhe unë kam shumë besim në të”, theksoi Benitez në konferencën e zakonshme para ndeshjes.
Në duelin tjetër të grupit, Parisi udhëton drejt Ukrainës për t’u përballur me Shakhtar Donetsk.
Në grupin B, Manchester United do kërkojë këndelljen përballë “ujqërve” të Ëolfsburg. Disfata në Holandë është e tejkaluar për trajnerin Luis van Gaal, por ai thekson se nuk do të tolerojë një tjetër gabim të radhës.
“Në Champions duhet t’i fitosh të gjitha ndeshjet në shtëpi për t’u kualifikuar në 1/8-at, përndryshe do të jetë e vështirë. Kemi problem me disa lojtarë të lënduar, por mendoj që ata që do jenë në dispozicion do jenë të gatshëm për të fituar”, theksoi van Gaal.
Ndeshja tjetër e grupit B, zhvillohet në Moskë, ndërmjet CSKA-së dhe PSV Eindhoven.
Në grupin C, Atletico Madrid do të ketë përballë portugezët e Benfica-s. Dy skuadrat kanë shënuar fitore në ndeshjet e para, prandaj kërkojnë pikët maksimale për të marrë kryesimin e grupit. Galatasaray në ndeshjen tjetër do udhëtojë në Azerbejxhan për t’u përballur me Astanan, në përpjekje për fitore. /tesheshi.com/
