UEFA ka caktuar gjyqtarët, të cilët do të drejtojnë ndeshjet e të enjtes në Ligën e Europës.
Ajo që bie në sy është fakti se takimi që do të luhet në Kiev mes Dinamos dhe Skënderbeut do të drejtohet nga një gjyqtar shumë i ri në moshë, por që shihet nga UEFA si një nga emrat me të ardhme të sigurt në arenën ndërkombëtare, raporton panorama sport.
UEFA ka caktuar për këtë ndeshje 29-vjeçarin belg Bart Vertenten, i cili gjykon në nivel kombëtar që nga viti 2011, ndërsa ka marrë stemën e FIFA-s, vetëm 3 vite më parë. Që atëherë, ai ka kaluar me shpejtësi nga kampionatet e moshave në turet paraeliminatore të Ligës së Europës dhe vitin e kaluar bëri debutimin në “skenat e rëndësishme” me ndeshjen e grupeve të këtij turneu mes Interit dhe Spartës së Pragës. Këtë sezon, ai ka drejtuar ndeshjet Brondbi-Vasa dhe Makabi Tel Aviv-Panionios në kualifikueset e Ligës së Europës.
Dinamo Kiev-Skënderbeu
Gjyqtar: Bart Vertenten (Belgjikë)
Asistentë: Rien Vanizer, Tibod Nijsen
Gjyqtarë të linjës: Vim Smet, Natan Verbomen
Gjyqtar i katërt: Frederik Godlen
Delegat i UEFA-s: Kampbell Ogilvi (Skoci)
Ndërkaq, do të ketë një përfaqësues shqiptar edhe në ndeshjen e Grupit K të Ligës së Europës mes Viteses dhe Lacios. Denis Bastari, drejtori i Departamentit të Administratës në FSHF, është i deleguar i UEFA-s në ndeshjen në fjalë. /tesheshi.com/
