Futbolli shqiptar sot do të shkruajë një faqe të re. Skuadra kampione, Skënderbeu bëhet skuadra e parë që nis garat në një kompeticion europian, përkatësisht në Ligën e Europës. Shorti u ka rezervuar korçarëve ndeshjen e parë me skuadrën turke të Beshiktash, e cila do luhet në “Elbasan Arena” dhe që nis në orën 21:05.
Skuadra e Beshiktash synon të dominojë në fushën e lojës përballë Skënderbeut dhe njëherit të rikthehet me pikë të plota nga ky udhëtim. Trajneri turk Senol Gynesh e di që do jetë një ndeshje e vështirë për lojtarët e tij, por në fund dëshiron që të marrin maksimumin nga kjo përballje.
“Ndeshja e parë gjithmonë është e vështirë, pasi dy skuadrat kërkojnë maksimumin e pikëve. Ne hymë në ndeshje pa disa lojtarë titullar, por pres një ndeshje të bukur nga dy skuadrat duke marrë parasysh edhe diciplinën që ka brenda fushës së lojës kundërshtari. Skënderbeu nuk ka lojtarë yje në skuadër por ka harmoninë brenda grupit. Sidoqoftë ne hymë për të fituar si në çdo ndeshje tjetër”, theksoi Gynesh në konferencën e zakonshme para ndeshjes.
Arritja e objektivit për të luajtur në Europë nuk mjafton për Skënderbeun. Trajneri i korçarëve, Mirel Jose kërkon nga futbollistët e tij një paraqitje sa më dinjitoze dhe pa shumë emocione.
“Kemi arritur objektivin e duhur prandaj nuk duhet të kemi shumë emocione. Duhet vazhdojmë më tej me paraqitje dinjitoze, duke u përqendruar maksimalisht në çdo ndeshje. Përballë kemi skuadrën më të fortë në Europë që jemi përballur deri më tani, prandaj kërkoj angazhim dhe përqendrim maksimal nga futbollistët e mi”, potencoi Josa gjatë konferencës.
/tesheshi.com/
