Udhëtim mbi 4 orë, me plotë 2550 kilometra të kaluara drejt Lisbonës për të marrë pikët e para të grupit. Skuadra kampione e Shqipërisë, Skënderbeu do ndeshet me Sporting Lisbonën në kuadër të javës së tretë të fazës së grupeve, duke synuar të bëjë ndonjë gol e të marrë ndonjë pikë, gjë që nuk e ka shijuar deri më tani, pa u mjaftuar me thjesht paraqitje dinjitoze.
Në konferencën e zakonshme para ndeshjes, tekniku i Skënderbeut, Mirel Josa ka vlerësuar lart skuadrën kundërshtare, si dhe ka bërë të ditura edhe objektivat për këtë ndeshje.
“Sporting është skuadra më e mirë e grupit, pavarësisht se kanë vetëm një pikë të grumbulluar deri më tani. Objektivi ynë si në çdo ndeshje tjetër, është të bëjmë paraqitje sa më të mira, të rrisim autoritetin në fushë, të gabojmë më pak në pasime dhe kështu të rritemi në skuadër. Ne kemi një ndeshje të vështirë në kampionat ndaj Partizanit këtë fundjavë, ndaj nuk kam rrezikuar me disa lojtarë të dëmtuar”, përfundoi Josa.
Kapiteni i korçarëve, Bledi Shkëmbi me gjithë respektin që shfaq për skuadrën e Sporting Lisbonës, tregoi se Skënderbeu nuk ka udhëtuar për turizëm.
“Sporting është një rival i vështirë, por ne nuk kemi udhëtuar për turizëm. Do mundohemi t`i ndëshkojmë në çdo rast që ne kemi mundësi. Kemi lojtarë të rinj me potenciale dhe kualitet shumë të mirë, prandaj mendoj që do e vëmë në vështirësi Sporting-un në këtë ndeshje”, theksoi Shkëmbi.
Skënderbeu ka humbur dy ndeshjet e para të grupit, ndaj skuadrave Beshiktash, (1-0) në shtëpi dhe ndaj Lokomotivës së Moskës, (2-0) në udhëtim. /tesheshi.com/
