Milani kërkon të ecë në rrugën e mëkëmbjes këtë sezon, ndërsa Arsenalit i duhet të bëjë përpara në Europa League për t’u ngushëlluar për mospjesëmarrjen në Champions League.
Veçse njëra prej këtyre skuadrave do duhet ta ndërpresë rrugëtimin në Ligën e Europës në mesin e muajit të ardhshëm, atëherë kur do të luhen ndeshjet e dyta të një të tetave.
Shorti i një të tetave të Ligës së Europës i ka vënë karshi Milanin dhe Arsenalin, si çifti më i fortë mes tetë përballjeve.
Sfida të tjera interesante të përcaktuara nga shorti i sotëm janë ato mes Olimpikut të Marsejës dhe Atletik Bilbaos, apo CSKA-së së Moskës dhe Olimpikut të Lionit.
Lacio e Strakoshës do të ndeshet me Dinamon e Kievit, Borusia e Dortmundit do të ketë për kundërshtar Salcburgun.
Atletiko e Madridit – Lokomotiv i Moskës, Lajpcig – Zenit dhe Sporting i Lisbonës – Viktoria Plzen plotësojnë tetëshen e takimeve të një të tetave.
Ndeshjet e para do të luhen më 8 mars, dhe të kthimit pas një jave. /tesheshi.com/
