Himni i Liverpulit i kënduar masivisht në stadiumin e Borusias, mijëra tifozë në këmbë duke duartrokitur, reporterë e fotografë të panumërt para stolit të Liverpulit. Kjo qe panorama e pragfillimit të ndeshjes së parë çerekfinale të Ligës së Europës mes Borusias së Dortmundit dhe Liverpulit. Dhe e tëra e kushtuar Jurgen Klopp-it, trajnerit të Liverpulit, që para një viti drejtonte Borusian.
Një ndeshje e jashtëzakonshme, me shumë ritëm, me raste të panumërta, me një sportivitet mbresëlënës. Atmosfera e ndezuar në stadiumin e mbushur plot, si ngahera, e bëri akoma më tërheqëse sfidën.
Befasia e parë i përkiste pikërisht Klopp-it, që kishte zgjedhur të hidhte në fushë Origi-n, e jo Sturridge-in. Dhe belgu ia shpërbleu besimin e me golin e tij. Një pjesë e parë e mbyllur me epërsinë e miqve, që e
nisin keq të dytën, kur pësojnë gol që në minutën e 48-të, teksa Hummels shënon me kokë.
Barazimin 1-1 nuk e prishin as sulmet e njëpasnjëshme të liverpulasve, ku spikat portieri vendas, Weidenfeller, me pritjet e shkëlqyera.
Vendasit gjithashtu patën rastet e tyre, por që mbetën të pafinalizuara.
Një 1-1 që e zhvendos sfidën javën e ardhshme në Angli, ku pritet një tjetër 90-minutësh spektakolar.
Në tre çerekfinalet e tjera, Shakhtari i Donjeckut fitoi në Portugali ndaj Sporting Bragës. Rezultati 1-2 e bën ekipin ukrainas thuajse të kualifikuar për në gjysmëfinalet e Ligës së Europës. Sevilja fitoi po ashtu me të njëjtin rezultat në fushën e Atletik Bilbaos, duke u shfaqur si pretendente për ta fituar dhe këtë vit trofeun e aktivitetit. 2-1 fitoi dhe skuadra tjetër spanjolle, Vilareali, ndaj Spartës së Pragës.
Ndeshjet e kthimit do të luhen të tëra të enjten e ardhshme. /tesheshi.com/
