Borussia Dortmund, Napoli, Rapid Wien dhe befasia e quajtur Molde kanë kaluar pragun e grupeve dhe tashmë presin rivalët e ardhshëm në fazën me eliminim të drejtpërdrejtë.
Në mesin e gjigantëve të tjerë europianë, skuadra novergjeze Molde ka kaluar në fazën tjetër të garave ndërsa ka gjunjëzuar skuadrën e famshme skoceze Celtic (1-2), për t’u vendosur në pozitën e parë të klasifikimit në grupin A.
Si lider i grupit D, Napoli e ka përfunduar me sukses para kohe misionin e fazës së grupeve, teksa ka grumbulluar pikët maksimale në katër ndeshje, plot 12 të tilla, dhe kështu është klasifikuar në mesin e skuadrave të para që kanë kaluar në fazën tjetër të garave. Italianët mposhtën bindshëm në shtëpi skuadrën daneze Midtjylland (5-0).
Borussia Dortmund-it e shfrytëzoi në maksimum rrëshqitjen e skuadrës greke PAOK, për të kaluar grupin, ndonëse ende nuk e ka të sigurt vendin e parë. Verdhezinjtë e drejtuar nga Tuchel u kanë mbajtur leksion azerëve të Qabala-së, duke i mposhtur me shifrat bindëse 4-0.
Rapid Wien-a e nisi garën në grupin E nga pozita e një skuadre me mundësi të pakta për t’u kualifikuar. Por, pas katër javëve të zhvilluara, austriakët kanë katër fitore dhe kanë siguruar një vend për në fazën tjetër. Në duelin e fundit, Rapid Wien-a triumfoi në udhëtim ndaj Viktoria Plzen-it (1-2) për të blinduar pozitën e parë në tabelë. /tesheshi.com/
