Janë mësuar edhe në Ligën e Europës katër skuadrat gjysmëfinaliste: Sevilla, Napoli, Fiorentina dhe Dnipro përbëjnë katërshen që do të luftojë deri në fund për të ngritur trofeun që sezonin tjetër i siguron pjesëmarrjen direkte në Ligën e Kampioneve.
Sevilla vazhdon rrugëtimin drejt mbrojtjes së titullit. Spanjollët kanë barazuar (2:2) me Zenitin në Petersburg, rezultat ky që ka mjaftuar për të shkuar tutje, pasi dueli parë kishte përfunduar në të mirë të skuadrës së Unai Emery.
Napoli dhe Fiorentina janë dy skuadrat nga Apeninet që kanë siguruar plasmanin për në gjysmëfinale. Napolitanët barazuan me gjermanët e Wolfsburg por epërsia e lartë e ndeshjes së parë (4:1) u ka mundësuar atyre që të marrin biletën për të ecur tutje. Në ndeshjen tjetër Fiorentina i’u është falur golave të Mario Gomez dhe Juan Vargas për ta kaluar Dinamon e Kievit.
Dinpro është skuadra e fundit që ka siguruar kualifikimin pasi ka mposhtur minimalisht Club Brugge për të siguruar kualifikimin në rrethin tjetër të garave. Goli i Yevhen Shakhov në minutën e 82-të, ka qenë përcaktues në këtë sfidë.
Nesër me fillim nga ora 12:00, hidhet shorti për gjysmëfinalet e Ligës së Kampionëve dhe të Europa Ligës, në Nyon të Zvicrës. /tesheshi.com/
