Liverpuli humbi krejt papritmas ndaj Vilarealit në Spanjë, në ndeshjen e parë gjysmëfinale të Ligës së Europës. Një gabim në rreshtimin në mbrojtje në minutën e 92-të u kushtoi shtrenjtë lojtarëve të Liverpulit, të mundur 1-0 në një takim të destinuar për një barazim pa gola.
Anglezët vinin në këtë takim pas atij eliminimi të bujshëm të Borusias së Dortmundit në çerekfinale. Por mungesat e shumta në formacion ia kishin zbehur forcën ekipit udhëtues, posaçërisht në sulm. Edhe pse mungonte Origi, në një formë të shkëlqyer kohët e fundit, Sturridge nuk luajti për asnjë çast.
Një pjesë e parë e vakët në “Camp El Madrigal” u shoqërua nga një 45 minutësh më i gjallë, me më shumë ngacmime. Por vendasit do të befasonin në minutën e 92-të. Me një kundërsulm atipik për këto momente të lojës, Adrian Lopez nuk e pati të vështirë të shënonte i pambuluar nga askush.
1-0 për Vilarealin, që kërkon një sukses të papërjetuar më herët. Megjithatë, për Liverpulin nuk ka mbaruar asgjë. Takimi i dytë gjysmëfinal në “Anfield” do të jetë një histori krejt ndryshe.
Në përballjen tjetër, Sevilja, që ia ka marrë dorën këtij aktiviteti dhe e ka bërë të sajin trofeun në dy sezonet e fundit, barazoi ndaj Shakhtarit të Donjeckut në “L’viv Arena”.
Një sfidë ku pati katër gola, nga dy për çdo skuadër. Spanjollët e gjetën golin që në minutën e 6-të me
anë të Vitolo-s. Ukrainasit reaguan shpejt, për të shënuar dy herë rresht, në minutën e 23-të dhe të 35-të. Shënuesit e golave qenë Marlos dhe Stepanenko.
Gameiro ktheu qetësisht në gol një 11-metërsh tetë minuta para mbarimit të lojës, duke vulosur barazimin 2-2. Barazim që është sigurisht në favor të Seviljes, që ndryshe nga paraqitjet jashtë, në fushën e vet vështirë të mposhtet.
Ky barazim i jep shpresë Seviljes se mund të jetë për herë të tretë në finalen e Ligës së Europës, për ta fituar atë po ashtu për të tretën herë radhazi, pasi e ka bërë këtë gjë në dy finalet e dy viteve të shkuara.
Ndeshjet e kthimit do të luhen të enjten e javës së ardhshme. /tesheshi.com/
