Pesë fitore, tre për skuadrat pritëse e dy për ato udhëtuese, tre barazime, si dhe 26 gola të shënuar. Ky është bilanci i tetë takimeve të para të një të tetave të Ligës së Europës, të zhvilluara mbrëmjen e së enjtes.
Olimpiku i Lionit i dha një mësim të mirë Romës, edhe pse do ta mbyllte pjesën e parë në humbje. Francezët fituan 4-2, një rezultat mjaft i mirë ndaj një kundërshtari si Roma. Diakhaby e kaloi Lionin në epërsi që në minutën e 8-të. Mohamed Salah dhe Fazio mundësuan me golat e tyre kthimin e situatës në favor të Romës në pjesën e parë. E dyta foli tërësisht për Lionin; tre gola të njëpasnjëshëm nga Tolisso, Fekir dhe Lacazette.
Rezultati më i thellë u regjistrua në përballjen tërësisht belge mes Gentit dhe Genkut. Miqtë fituan 2-5 ndaj skuadrës që në turin pararendës kishte eliminuar Totenhemin.
Me të njëjtin rezultat, 2-1, u mbyllën dy takime, Kopenhagen – Ajaks dhe Selta Vigo Krasnodar. Shifra që e lënë gjithçka të hapur për ndeshjet e kthimit.
Me fitore 0-1 u kthye Anderlehti nga përballja në Qipro me APOEL-in; e dyta fitore në transfertë e mbrëmjes.
Të tre barazimet mes tetë sfidave qenë të njëjta: 1-1. Kështu u ndanë Rostovi me Mançester Junajtedin, ku fillimisht shënoi Mkhitaryan për miqtë e barazoi Bukharov për vendasit. Kështu përfundoi dhe sfida në Athinë mes Olimpiakosit dhe Beshiktashit. Cambiasso, lojtari argjentinas që dikur luante për Realin e Madridit dhe Interin, shënoi në pjesën e parë për grekët; një gol i barazpeshuar nga ai i Aboubakar-it në minutën e 53-të. Turqit morën atë çka deshën nga një ndeshje ku nuk munguan dhe incidentet në shkallët e stadiumit. Përplasja gjermane, Shalke – Borusia e Mynshegladbahut, pati të njëjtin përfundim; barazimi qe rezultati i dy golave të pjesës së parë.
Të enjten e 16 marsit luhen sfidat e dyta, që përcaktojnë dhe skuadrat çerekfinaliste të Ligës së Europës. /tesheshi.com/
