Ministrat e Jashtëm të vendeve arabe, të mbledhur dje në Kajro në takimin e jashtëzakonshëm të Ligës Arabe, të kërkuar nga sauditët, i kanë dënuar ashpër sulmet mbi misionet diplomatike të Arabisë Saudite në Iran. Në të njëjtën kohë, ata kanë paralajmëruar se Irani do të përballet me kundërvënie më të gjerë nëse vazhdon ndërhyrjen në punët e brendshme të vendeve arabe.
Me përjashtim të Libanit, për shkak të pranisë së Hezbullahut të mbështetur nga Irani, të gjithë të pranishmit kanë votuar në favor të një deklarate të përbashkët, ku denoncohen provokimet dhe aktet armiqësore të Iranit.
Ministri i Jashtëm i Arabisë Saudite, Adil el-Xhubejri, dha një konferencë shtypi pas takimit, ku tha se Irani duhet të heq dorë nga ndërhyrja në punët e saj të brendshme nëse dëshiron përmirësimin e marrëdhënieve.
“Irani mund të jetojë në rajon si fqinj vetëm nëse u jep fund këtyre qasjeve, por po qe se vazhdon qasjen e dhunshme, ka për t’u përballur me kundërshti nga bota arabe,” ka nënvizuar kryediplomati saudit.
El-Xhubejri shpjegoi se ndërprerja e marrëdhënieve diplomatike e tregtare ishte vetëm hapi i parë, e se Arabia Saudite do të diskutonte me aleatët rajonalë e ndërkombëtarë veprime të mundshme të mëtejshme ndaj Iranit. /tesheshi.com/
