Arnaldo Otegi, 57-vjeçari separatist bask, la dje burgun Logrono në veri të Spanjës pas gjashtë vitesh e gjysmë në të. Ai u prit si një hero me të kaluar portën e burgut, dhe u rrethua nga qindra mbështetës që tundnin flamujt baskë dhe thirrnin “pavarësi”.
Otegi e përshkroi veten si një të “burgosur politik”, duke e bërë të qartë njëkohësisht se ishte i vendosur të vijonte fushatën për pavarësinë baske.
Vitet e qëndrimit të tij të gjatë në burg do të ishin për shkak të përpjekjes së tij për të ringjallur Batasuna-n, krahun politik, të nxjerrë jashtë ligjit, të ETA-s. Arnaldo Otegi do të dënohej fillimisht me dhjetë vite burg, të zbritura më pas nga Gjykata e Lartë spanjolle në gjashtë vite e gjysmë.
Ai është vetë një ish-anëtar i ETA-s, grupit militant bask, përgjegjës për vrasjen e mbi 800 njerëzve në atentate dhe në sulme me bomba. ETA do të shpallte një armëpushim në 2011-ën, por nuk i ka pranuar kërkesat për një shpërbërje zyrtare.
Batasuna do të nxirrej jashtë ligjit në vitin 2003, si krahu politik i ETA-s, e rishfaqur tashmë si një parti legale pro pavarësisë, e quajtur Sortu. Kjo parti bën fushatë për pavarësinë me mjete demokratike, dhe Otegi u zgjodh sekretar i përgjithshëm i saj në 2013-ën, ndërsa ishte prapa hekurave.
E lënë në hije nga përpjekjet e Katalonjës për t’u ndarë nga Spanja dhe për të dalë si entitet më vete, çështja baske duket se do të marrë më shumë vëmendje me lirimin e Arnaldo Otegi-t.
Vetë i sapoliruari nga burgu do t’u kërkonte mbështetësve të ndiqnin shembullin e Katalonjës. “Katalanasit po na japin një mësim të vërtetë se çfarë duhet bërë, dhe unë i falënderoj,” i tha ai turmës së përkrahësve. /tesheshi.com/
