Lideri europian që kërkon të flasë me Putinin

Kancelari gjerman Olaf Scholz tha se dialogu me presidentin rus Vladimir Putin është i nevojshëm dhe se ai do ta vazhdojë atë.

“Sot, në këtë situatë, është e nevojshme të flasim me të vazhdimisht. E kam bërë në të kaluarën dhe do ta bëj sërish në të ardhmen. Por bisedimet midis Ukrainës dhe Rusisë kërkojnë një hap vendimtar nga pala ruse, dhe kjo nënkupton tërheqjen e trupave. Vladimir Putin padyshim që nuk është ende gati për këtë”, tha ai për gazetën gjermane Heilbronner Stimme.

Kancelari gjerman tha se Putin planifikoi t’i arrinte qëllimet e tij në Ukrainë brenda dy javësh, por kjo nuk funksionoi.

“Ukraina gjithashtu ktheu shumë territor. Rusia duhet të detyrohet të tërhiqet”, tha Scholz.

Kur u pyet nëse lufta e Izraelit në Gaza e vendos agresionin e Rusisë në prapavijë dhe për sa kohë Gjermania do të vazhdojë të furnizojë me armë Ukrainën, ai tha se do ta bënte këtë për aq kohë sa të jetë e nevojshme.

“Sulmi i Rusisë ndaj Ukrainës është kthimi i imperializmit në Evropë. Kjo është arsyeja pse kjo është një pikë kthese dhe dërgesat e armëve janë në rendin e ditës për aq kohë sa është e nevojshme”, theksoi Scholz. /tesheshi.com/