Nga Blendi Gashi
Liderët e partive politike në Kosovë pas një kohe të gjatë janë ulur të gjithë në një tavolinë, sigurisht jo për të pirë kafe, por për të gjetur një zgjidhje të përbashkët për çështjen e Demarkacionit me Malin e Zi dhe deklaratës së përbashkët rreth liberalizimit të vizave.
Ndërsa do të duhej presidenti i vendit, Hashim Thaçi, si faktor uniteti të thërriste takimet e liderëve ashtu siç bënte Atifete Jahjaha, një gjë të tillë po e bën Naim Rashiti nga Grupi Ballkanik për Politika, që po luan rolin e ndërmjetësit.
Por, edhe këtij të fundit nuk po i shkon mbarë ndërmjetësimi pasi që krerët e partive politike vazhdojnë të kenë qëndrime kundërshtuese rreth Demarkacionit.
Në takimi, përveç liderëve Kadri Veseli (PDK), Isa Mustafa (LDK), Visar Ymeri (VV), Ramush Haradinaj (AAK) dhe Jakup Krasniqi nga NISMA prezent ishin edhe ambasadorë të vendeve të Quintit e shefja e zyrës së BE-së në Kosovë, por deri më tani as “presioni” i këtyre të fundit nuk po kryen punë.
Nga të gjithë të lartcekurit, takimin para kohe e lëshoi kreu i AAK-së, Ramush Haradinaj i cili tha se “Isa Mustafa në takim ka folur sikur Murat Meha para një viti dhe nuk ka mundur ta durojë”.
Takimi, ashtu siç pritej, përfundoi pa ndonjë marrëveshje, i shtati në përgjithësi i këtij niveli.
Abrashi: Opozita kërkoi rishqyrtim për Demarkacionin
Pozita dhe opozita akuzojnë njëra-tjetrën për mosarritjen e marrëveshjes.
Zëdhënësi i qeverisë Arban Abrashi nga LDK, ka bërë të ditur se takimet e tilla do të vazhdojnë edhe në ditët në vijim në përpjekje të një zgjidhjeje.
Ai ka treguar për portalin tesheshi.com arsyet pse sot dështoi takimi i liderëve.
“Paritë opozitare dje kanë shtuar fjalë shtesë nga drafti. Kanë kërkuar me shtu një fjalë shtesë, fjalën rishqyrtim, pra me rishqyrtu çështjen e Demarkacionit. Ideja ka qenë të shqyrtohet edhe një herë. Ne do ta ofrojmë krejt dokumentacionin mes partive politike. Në do vazhdojmë në grupe të eksperteve e teknike deri në marrëveshje. Liderët u pajtuan me pas takime të radhës. Ideja është që të vazhdohet komunikimi dhe të gjindet një koncensus për çështjen e Demarkacionit”, ka thënë Abrashi, për tesheshi.com.
Krasniqi: Pozita fajtore për dështimin e takimit
Ndërkaq, opozita fajëson pikërisht partitë në pushtet për dështimin e takimit.
Kryetari i Këshillit Kombëtar të Nisma-s Jakup Krasniqi pas takimit tha se marrëveshja nuk u arrit pasi koalicioni qeverisës nuk pati gatishmëri, derisa tha se opozita ka pritur që të nënshkruhet deklarata.
“Koalicioni qeverisës nuk është i gatshëm ta rishikoj marrëveshjen për Demarkacionin, ndonëse rishikimi nuk e paragjykonte marrëveshjen”, ka thënë Krasniqi, përtesheshi.com.
Ndryshe, edhe dy liderët e partive tjera, kreu i PDK-së Kadri Veseli dhe ai i VV-së, Visar Ymeri pas takimit kanë thënë se takimet e tilla do të vazhdojnë edhe në ditët në vijim. /tesheshi.com/
