Kryetari i Këshillit Evropian, Charles Michel, ka bërë të ditur se bashkë me kolegët e tij nga Bashkimi Evropian ka takuar ndaras kryeministrin e Kosovës, Albin Kurti dhe presidentin e Serbisë, Aleksandar Vuçiç.
“Me Josep Borrell dhe kolegë nga BE-ja u takova me kryeministrin Albin Kurti dhe më pas me presidentin Aleksandar Vuçiç. Deeskalimi dhe kthimi në normalizimin e marrëdhënieve ndërmjet Beogradit dhe Prishtinës është thelbësor”, tha Michel në rrjetin X.
Ai shtoi se pret që Këshilli Evropian të vazhdojë bisedimet.
Pas takimit nuk ka pasur deklarata, por mediat kanë raportuar se Borell dhe Lajçak kanë vazhduar takimet e ndara fillimisht me Vuçiçin, e më pas me Kurtin.
Siç tha më herët zëdhënësi i BE-së, Peter Stano, këto takime vijnë pas vizitës së pesë të dërguarve evropianë dhe amerikanë në Prishtinë dhe Beograd fundjavën e kaluar, kur nga të dyja palët u kërkua që të zbatojnë plotësisht marrëveshjet e arritura deri më tani.
Takimet mbahen në prag të Samitit të liderëve të BE-së në Bruksel.
Pasi Vuçiç dhe Kurti arritën një marrëveshje më 27 shkurt për rrugën e normalizimit të marrëdhënieve, në Ohër më 18 mars u pranua aneksi i asaj marrëveshjeje, që në fakt është plani i zbatimit i marrëveshjes së shkurtit.
Edhe pse BE-ja pretendon se është arritur një marrëveshje për të dyja këto dokumente, asnjëra nuk është nënshkruar.
Kryeministri i Kosovës Albin Kurti pajtohet me planin e ri të prezantuar nga anëtarët e delegacionit të lartë të Bashkimit Evropian, SHBA-së, Gjermanisë, Francës dhe Italisë gjatë vizitës së tyre në Kosovë, i cili do të jetë kornizë për bisedimet e mëtejshme, njoftoi Qeveria e Kosovës. /tesheshi.com/
