Liderët e Bashkimit Europian u zotuan të japin më shumë ndihmë për agjencitë e OKB-së që përkujdesen për refugjatët në Lindjen e Mesme, si pjesë e një përpjekjeje për të vendosur nën kontroll krizën e refugjatëve në BE.
Ata kanë miratuar 1 miliard euro në ndihmë të refugjatëve. Ndihmë më e madhe do të ofrohet edhe për fqinjët e Sirisë, ku janë dhënë edhe më herët miliona që kur nisi konflikti në Siri. Liderët e BE-së të mbledhur në samitin e tensionuar për shkak të vendosjes së kuotave të detyrueshme për rishpërndarjen e refugjatëve, kanë diskutuar edhe për politikën e forcimit të kufijve të jashtëm.
Presidenti i Këshillit Europian, Donald Tusk paralajmëroi se “vala më e madhe e refugjatëve pritet ende të vijë”.
“Kemi nevojë të korrektojmë politikën e dyerve dhe dritareve të hapura”, tha ai.
Pothuajse gjysmë milioni refugjatë kanë mbërritur në Europë këtë vit, duke nxitur edhe dallime të mëdha brenda vetë Bashkimit Europian.
Samiti i Brukselit u mbajt pas konflikteve të ashpra midis vendeve për rishpërndarjen e 120 mijë emigrantëve. Disa vende e kundërshtuan skemën e kuotave të detyrueshme, madje Sllovakia ka nisur edhe një padi ligjore.
Tusk tha gjithsesi, se samiti kishte pasur frymë bashkëpunimi. Ai tha se katër milionë sirianë janë larguar drejt vendeve fqinje që do të thotë “duhet të flasim për miliona refugjatë të mundshëm që mbërrijnë në Europë vetëm nga Siria, për të mos folur për vende të tjera”.
Liderët europianë ranë dakord për ngritjen e vendeve speciale të procesimit të kërkesave për azil në vendet e para kufitare të BE-së, ku do të identifikohen dhe kontrollohen azilantët e rinj. /tesheshi.com/
