Librat mbi mbledhjen dhe gatimin e kërpudhave të egra të disponueshme për shitje në faqen Amazon mund të përmbajnë këshilla të rrezikshme, ka paralajmëruar gazeta Guardian.
Sipas faqes britanike, disa libra të shitur përmes faqes janë shkruar me teknologji AI, e cila fshihet nga blerësi i cili supozon – duke parë emrin e autorit – se janë krijuar nga një njeri. Fenomeni gjendet shpesh në guidat e udhëtimit, por së fundmi është përhapur edhe në zhanre të tjera, të cilat mund të jenë të rrezikshme.
Originality.ai, një kompani amerikane që identifikon përmbajtjen e krijuar duke përdorur Inteligjencën Artificiale, shqyrtoi katër fragmente nga udhëzuesit për mbledhjen dhe gatimin e kërpudhave për Guardian. Të katër mostrat shënuan 100% në testin e zbulimit të AI që kompania krijoi, me drejtuesit e saj tani duke thënë me siguri se librat janë shkruar nga një chatbot si ChatGPT.
Faqja britanike ka tentuar të kontaktojë autorët e librave, të cilët kanë tituj të tillë si “From the Forest to Your Table: The Complete Guide to Cooking Wild Mushrooms” dhe “The Ultimate Guide to Mushrooming in the Southwest”, por deri më tani nuk ka marrë asnjë përgjigje.
Leon Frey, një ekspert që punon në fondacionin arsimor Family Foraging Kitchen në Cornwall, i cili organizon turne që mësojnë mënyrën e duhur për të mbledhur kërpudhat, thotë se mostrat në fjalë përmbajnë gabime serioze. Për shembull, ata i referohen përdorimit të shqisave të nuhatjes dhe shijes si një metodë për identifikimin e kërpudhave të sigurta, duke inkurajuar në këtë mënyrë “gjuetarët e kërpudhave” amatorë të… shijojnë dhe më pas të gjykojnë. “Kjo nuk duhet bërë në asnjë rrethanë”, thekson ai, pasi ka shumë kërpudha helmuese që në asnjë rrethanë nuk duhet t’i afrohen gojës.
Një libër tjetër i gatimit me kërpudha përmend kërpudhat “Mane e Luanit” e cila është e ngrënshme, por është një specie e mbrojtur në MB dhe nuk duhet të mblidhet.
“Unë do t’u sugjeroja palëve të interesuara të zgjidhnin libra nga burime më të besueshme,” thotë Frey.
Profesori Myron Smith nga Universiteti Carleton në Kanada i quajti librat “plotësisht të papërgjegjshëm”. Sipas tij, disa dallime mes kërpudhave të ngrënshme dhe të tjerave që nuk duhen ngrënë janë delikate dhe duhet një sy me përvojë dhe njohuri të mjaftueshme për t’i dalluar ato.
Amazon tha se do të rishikonte librat e referuar nga Guardian dhe do të merrte veprimet e nevojshme. “Ne i marrim këto ankesa shumë seriozisht, pasi qëllimi ynë është të ofrojmë një mjedis të sigurt blerjeje për konsumatorët dhe lexuesit”, tha kompania. /tesheshi.com/
