Dy incidente jo të vogla e të zhurmshme, kanë tronditur LIBRA-n, partinë e themeluar me bujë nga Ben Blushi dhe Mimoza Hafizi, dy deputetë të larguar nga PS-ja në prag të zgjedhjeve të 25 qershorit. Ndryshe, ishte partia e lindur nga një frymë intelektuale anti-Rama, jo inteklektualisht por politikisht.
Pas një sherri literal mes kryetarit Blushi dhe nënkryetares Hafizi me anë mesazhesh elektronikë, situata ka degraduar në një përlasje fizike në mes përkrahësve militantë të dy figurave në një mbledhje partie.
Blushi dhe Hafizi janë konfliktuar për të ardhmen e LIBRA-s, që sipas ish-deputetes, pedagoge e Fizikës, duhet të ketë një drejtim kolegjal me dy bashkëkryetar.
Blushi nuk ka pranuar dhe e ka cilësuar ish-bashkëpunëtoren si “hileqare”. Hafizi ka deklaruar më pas se ndjehet e lodhur dhe se do të tërhiqet nga politika.
Më pas, në një mbledhje forumesh në Tiranë, ku ka marrë pjesë edhe Ben Blushi, përkrahësit e tij janë konfliktuar me një pasues të znj. Hafizi. Në disa media online janë publikuar video të këtij sherri që ishte mjaft i ashpër.
A po shkon drejt fundit partia e Blushit?
Post-25 qershori tregoi se vështirë të mbijetojë si faktor, duke mbetur thjesht si sigël, për t’u përmendur në raste sherresh të brendshme. Si tani. /tesheshi.com/
