I dërguari i posaçëm i OKB-së, Bernardino Leon, ka deklaruar sot nga Maroku se zyrtarë nga dy qeveritë rivale në Libi, nga ajo në Tripoli dhe nga tjetra në Tobruk, kanë rënë dakort për pikat kryesore të një marrëveshjeje përfundimtare politike.
“Ne kemi arritur atë çka e konsiderojmë se është një konsensus mbi elementët kryesorë,” tha Leon në konferencën e shtypit në Skhirat, aty ku po zhvillohen bisedimet.
Sipas të dërguarit të OKB-së, të dy palët ishin në gjendje t’i kapërcenin dallimet e tyre mbi çështjet kryesore, duke e shtuar mundësinë e nënshkrimit të një marrëveshjeje për të formuar një qeveri uniteti.
“Ne do t’ua shpërndajmë tekstin [e marrëveshjes së propozuar] palëve… Ne besojmë se ky tekst do të marrë mbështetjen e plotë të të dy palëve, të Dhomës së Përfaqësuesve [me bazë në Tobruk] dhe të Kongresit të Përgjithshëm Kombëtar [me bazë në Tripoli],” qartësoi Bernardino Leon.
Palët kanë kohë deri më 20 gusht të zgjidhin mosmarrëveshjet dhe të bien dakort për kushtet e një qeverie uniteti.
Libia është në kaos që prej 2011-ës, vit në të cilin mori fund sundimi i Muammer Gadafit, i cili u ekzekutua. Ndasitë politike në vend kanë prodhuar dy qeveri, një në Tripoli dhe një në Tobruk. /tesheshi.com/
