Muaj të tërë bisedimesh në Marok mes organeve qeverisëse rivale të Libisë duket se kanë dhënë rezultat.
Bernardino Leon, i dërguari i posaçëm i OKB-së për Libinë, ka dhënë mbrëmjen e së enjtes lajmin e një qeverie të unitetit kombëtar për Libinë. Ai u ka thënë gazetarëve se janë vendosur dhe emrat e kandidatëve për këtë qeveri.
Leon deklaroi se kryeministri për qeverinë e re është një anëtar i administratës qeverisëse të Tripolit, Fajez Sarraxh. Gjithashtu ai paraqiti dhe emrat e tre zëvendëskryeministrave, që do të përfaqësojnë lindjen, perëndimin dhe jugun e Libisë.
“Ne besojmë se kjo listë do të funksionojë,” tha Leon, duke shtuar për të zgjedhurit në qeveri se, “të gjithë ata do të punojnë si një ekip.”
Më pas ai do t’u drejtohej të gjithë libianëve, me një thirrje për ta, “Ajo që do t’u kërkoj të gjithë libianëve është të mos mendojnë se çfarë po mungon, çfarë do të donin të shihnin në këtë listë e çfarë jo, por të mendojnë se nëse mbështetet nga të gjithë libianët, ka për të qenë qeveria më e mirë në botë.”
Sidoqoftë, ende nuk është e qartë nëse propozimet e OKB-së do të pranohen nga të dyja palët.
Libia është në kaos që prej rënies së regjimit të Muamer Gadafit, dhe prej kohësh qeveriset nga dy administrata rivale. /tesheshi.com/
