Lajmi i gëzueshëm i rekomandimit të Komisionit Europian për liberalizimin e vizave të Kosovës, i cili vjen fill një ditë pas pranimit të Kosovës në Uefa, është përshëndetur nga shumë faktor politikë brenda dhe jashtë vendit.
Ka qenë Kryeministri i Shqipërisë, Edi Rama, ai i cili uron Kosovën për këtë hap përpara drejt rrugës së sja Europiane, ndërsa është shprehur në një postim të shkurtër në Facebook se “Më në fund, BE-ja po çlirohet nga një turp”.
“Fill pas UEFA-s tjetër lajm i gëzueshëm për Kosovën rekomandimi i Komisionit për heqjen e vizave. Më në fund BE-ja po çlirohet nga një turp!”, – shkruan Rama.
Krahas tij, Presidenti i Kosovës, Hashim Thaçi shprehet se nuk do të ketë më radhë të gjata në ambasada dhe se kjo nuk është një dhuratë, por Kosova e meritoi.
“Pas dekadave të izolimit, nuk do të ketë më pritje para ambasadave, nuk do të ketë refuzime. Nuk kemi fituar dhuratë, por kemi merituar liberalizimin me punën tonë të përbashkët. Kur punojmë bashkë, asnjë kufi nuk na ndal. Urime liberalizimi sot, urime edhe për UEFA dje. Javë historike”, – përmbyll Hashim Thaçi reagimin e tij.
Nga ana e tij, Kryeministri Isa Mustafa e ka cilësuar këtë rekomandim si rezultat i punës së qeverisë.
“Urime Qytetarë të dashur! Rekomandimi pozitiv për heqjen e vizave është vlerësimi më i merituar për qytetarët e Republikës së Kosovës nga Bashkimi Evropian. Rezultatet e punës së Qeverisë çdo ditë e më shumë janë të prekshme për qytetarët e Kosovës, qytetarë të kontinentit dhe të vlerave evropiane”, – thotë Mustafa./tesheshi.com/
