Nga Blendi Gashi
Pushteti, me qëllim që të bëj trysni sa më të madhe tek deputetët, në vazhdimësi pohon se ratifikimi i marrëveshjes për demarkimin e kufirit me Malin e Zi është kushti i vetëm për heqjen e vizave, në të kundërtën thonë se qytetarët do mbesin të izoluar edhe për disa vite.
Por, krerët e shtetit, ndonëse nuk e thonë, janë mëse të vetëdijshëm se një kriter tjetër i madh që do vihet kusht nga Bashkimi Evropian do të jetë edhe luftimi i korrupsionit.
Në çdo raport ndërkombëtarë, sidomos në Raport Progresin apo vizitat që zyrtarë të shteteve të ndryshme bëjnë në Kosovë, kërkojnë me ngulm luftimin e korrupsionit dhe krimit të organizuar, nëse duan të ecin drejt rrugës evropiane.
Një arsye tjetër që mund të shtyjë liberalizimin e vizave është edhe frika se kosovarët do emigrojnë në mënyrë masive, gjithmonë duke pasur parasysh ikjet ilegale që ndodhën në fillim të 2015-tës.
Se Kosova mund të mos përfitojë nga liberalizimi i vizave edhe pas ratifikimit të Demarkacionit ka deklaruar edhe Ulirke Lunaçek, nënkryetarja e Parlamentit Evropian.
Një mendim të tillë e kanë edhe njohës të integrimeve e analistë, të cilët thonë se do paraqiten edhe kritere të tjera për heqje të vizave.
Besa Shahini, njohëse e çështjeve të integrimit evropian, mendon se qytetarëve nuk u garantohet lëvizja e lirë edhe nëse kalon Demarkacioni.
“Po, ratifikimi i Demarkacionit është kusht për ta vazhduar procesin e liberalizimit të vizave. Nuk ka qenë para majit 2016 por është bërë me rekomandimin e Komisionit Evropian. Por, ratifikimi nuk garanton liberalizimin e vizave ngaqë Kosova për Bashkimin Evropian vazhdon të paraqes rrezik migrimi ilegal dhe shtetet anëtare janë të mendimit që liberalizimi tash për tash nuk është ide e mirë”, thotë Shahini, për tesheshi. com.
Ndërsa analisti Faik Krasniqi, e quan më shumë lojë të qeverisë deklarimet se nuk ka heqje të vizave pa u ratifikuar Demarkacioni, duke thënë se vendi duhet plotësuar edhe kritere të tjera.
“BE-ja në çdo deklaratë potencon që Kosova pa i përmbushur edhe dy kriteret e mbetura, Demarkacionin me Malin e Zi dhe luftimin e korrupsionit, nuk do t’i hiqen vizat. Këtë e tha së fundmi edhe Tanja Fajon gjatë vizitës që bëri në vendin tonë. Ndërsa, qeveria përmend si kusht vetëm Demarkacionin, dhe padyshim se është një lojë e saj. Nëse korrupsioni është kusht serioz i BE-së, atëherë ne nuk mund ta fitojmë liberalizimin edhe dy dekada”, thotë Kransiqi për tesheshi. com.
Ai shton se BE frikësohet edhe nga ikja masive e kosovarëve drejt shteteve të ndryshme andaj mund ta vonojë këtë proces.
“Nuk besoj që do të ketë kriter shtesë nga BE-ja, por zvarritje do ketë aq sa munden, për shkak të frikës nga ana e tyre se Kosovën do e lëshojnë një pjesë e konsiderueshme e qytetarëve. Një gjë të tillë e thonë edhe shumë anketa, që Kosova do të zbrazet pas liberalizimit të vizave”, thotë Krasniqi. /tesheshi.com/
