Qindra mijëra njerëz kanë mbushur mbrëmë rrugët e Libanit duke shënuar protestat më të mëdha që kërkojnë dhënien fund të problemeve ekonomike dhe luftimin e korrupsionit.
Protestat janë shtuar që nga e enjtja mbrëma, dhe shkak i tyre ishte një taksë për thirrjet në WhatsApp dhe ofrues tjerë telefonikë që realisht janë falas në vende të tjera.
Kryeqyteti i vendit, Bejruti, dhe qyteti i dytë më i madh Tripoli, u bllokuan nga protestues me flamurin kombëtar që brohorisnin “revolucion” dhe “populli kërkon rënien e regjimit”.
“Kam dalë sepse jam i neveritur nga politikanët tanë. Asgjë nuk funksionon …”, thotë Cherine Shawa, 32 vjeçe, arkitekte që punon në Bejrut.
Ndalimi i korrupsionit të shfrenuar është një kërkesë madhore e protestuesve, të cilët thonë se udhëheqësit e vendit kanë përdorur pozicionet e tyre për t’u pasuruar për dekada me radhë përmes marrëveshjeve të favorshme.
Kjo është një ndër të rrallat herë kur protestuesit janë bashkuar nën flamurin kombëtar duke thyer përçarjen sektare në vend.
Al Jazeera raporton se në protesta kishte besimtarë musliman sunitë, të krishterë, shiitë dhe dervish ku të gjithë qëndronin para parlamentit për të siguruar që protestat të mbeteshin paqësore. Vendi me rreth 4.5 milion njerëz pret rreth 1.5 milion sirianë që shpëtuan nga konflikti. /tesheshi.com/
