Negociatat intensive mes Libanit dhe Izraelit për demarkacionin e kufirit detar po shkojnë drejt një fundi të lumtur. Të dy vendet janë afër një marrëveshjeje “historike”, e cila do të lejojë heqjen e pengesave për shfrytëzimin e depozitave hidrokarbure në Mesdheun lindor.
Libani dhe Izraeli janë zyrtarisht në luftë për një mosmarrëveshje kufitare. Për dy vjet, megjithatë, ka ndërmjetësim të SHBA. Në fillim të tetorit, të dy vendet ishin shprehur të kënaqur me një projekt-marrëveshje të paraqitur nga ndërmjetësi amerikan Amos Hochstein. Por të enjten e kaluar, Izraeli hodhi poshtë një sërë ndryshimesh libaneze.
Përgjigje pozitive nga Izraeli
Bisedimet kanë vazhduar ditët e fundit. Sot në mëngjes, Izraeli njoftoi se kishte marrë një përgjigje pozitive për shqetësimet e tij në lidhje me amendamentet e Libanit.
“Të gjitha kërkesat tona janë pranuar, janë bërë ndryshimet që kemi kërkuar. Ne kemi siguruar interesat e sigurisë së Izraelit, jemi në rrugën e një marrëveshjeje historike”, tha Eyal Hulata, këshilltar për sigurinë kombëtare i kryeministrit izraelit Yair Lapid.
Më pas, një zyrtar i lartë libanez i përfshirë në negociata theksoi se Bejruti kishte pranuar propozimin përfundimtar të ndërmjetësit amerikan, i cili “përfshin shumicën e kërkesave ose propozimeve të Libanit”.
Propozimi përfundimtar i ndërmjetësit amerikan do t’i jepet gjatë ditës presidentit libanez Michel Aoun, sipas të njëjtit burim.
Çfarë parashikon plani?
Sipas njoftimeve të shtypit dhe zyrtarëve, projekt-marrëveshja parashikon që fusha e gazit Karis të kontrollohet nga Izraeli dhe fusha e gazit Qana, e vendosur më në veri-lindje, nga Libani.
Por ndërsa një pjesë e kësaj fushe kalon vijën e ardhshme të demarkacionit, Izraeli do të marrë një pjesë të të ardhurave të ardhshme nga shfrytëzimi i Qana-s, thanë të njëjtat burime.
Netanyahu kërcënon se nuk do ta respektojë marrëveshjen
Në Izrael, lideri i opozitës Benjamin Netanyahu kritikoi planin javën e kaluar, duke akuzuar qeverinë për “pranim” të “territorit sovran ndaj Izraelit”, ndërsa kërcënoi se nuk do të respektojë marrëveshjen nëse do të jetë sërish kryeministër pas zgjedhjeve të 1 nëntorit.
Netanyahu ka kërkuar gjithashtu që draft-marrëveshja të dorëzohet në Knesset për miratim ose të mbahet një referendum.
Ndërsa BE-ja përpiqet të gjejë burime alternative të importit të gazit natyror pas pushtimit rus të Ukrainës, Izraeli po mbështetet në fushën e Karisit, e cila është gati të fillojë prodhimin, për të rritur eksportet e gazit në kontinentin e vjetër.
Ndryshe nga Karis, fusha e Qana-s është larg nga të qenit në gjendje të prodhojë gaz natyror. /tesheshi.com/
