Ceremonisë së hapjes së Lojërave Olimpike në Rio de Zhanejro i ka paraprirë një incident mes delegacioneve të Izraelit dhe të Libanit.
Ende nuk është e qartë se për çfarë arsyeje është kërkuar që sportistët libanezë dhe izraelitë të udhëtojnë së bashku drejt stadiumit “Marakana”, duke ndarë të njëjtin autobus, por fakti është se një gjë e tillë nuk ka ndodhur.
Delegacioni libanez ka qenë brenda në autobus, në pritje për t’u nisur drejt stadiumit, kur është kërkuar që në të të ngjiten dhe pjesëtarë të delegacionit izraelit. Libanezët nuk kanë pranuar assesi që të ndajnë të njëjtin autobus me izraelitët.
Gjithçka ka qenë duke shkuar drejt një përplasjeje fizike, pasi libanezët kanë kërkuar mbylljen e derës së autobusit, kurse izraelitët kanë pretenduar që ata të zbresin nëse nuk duan të udhëtojnë së bashku.
Organizatorët i kanë gjetur zgjidhje situatës duke e nisur delegacionin izraelit me një autobus tjetër.
Izraeli e ka përshkruar këtë si një akt armiqësor. Libani dhe Izraeli nuk kanë marrëdhënie diplomatike, me një marrëdhënie vijueshmërisht të nderë dhe konfliktuale mes tyre. /tesheshi.com/
