Nga Ahmet Zani
Pas 65-vitesh i humbur, janë gjetur eshtrat e një të pushkatuari nga regjimi komunist, banor i fshatit Mërqi të Lezhës.
Eshtrat e Ndrec Mark Zefit u gjetën në malin e fshatit, në afërsi të kishës ku ishte pushkatuar në moshën 41-vjeçare pas kundërshtimit të regjimit të kohës.
Ka qenë këmbëngulja e familjarëve që mundësoi gjetjen e eshtrave, të cilat i kërkonin prej 25-vitesh dhe sot ëndrra e tyre u bë realitet.
Vajza e të pushkatuarit, Dile Ndreca thotë se sot ndihet e lumtur që gjeti eshtrat e babait, pasi i kishin humbur shpresat.
“Ka 25 vite që kërkoj eshtrat e babait tim. S’kemi lënë vend pa kërkuar por ka qenë tepër e vështirë për t’i gjetur.Dikush më thotë kanë humbur, e dikush nuk janë këtu.Na dhanë informacion se në malin pranë kishës është vrarë babai dhe nisëm të kërkojmë. Kemi gërmuar në disa vende këtu dhe më në fund i gjetëm eshtrat e tij. Unë sot jamë shumë e gëzuar, pasi i kisha humbur totalisht shpresat se një ditë do të gjej eshtrat e babait tim. Ai është vrarë në moshen 41-vjeçare dhe unë në atë kohë kam qenë shumë e vogël. Jam rritur jetime dhe kam qëndruar tek shtëpia e gjyshërve të mi, derisa jam martuar”, thotë Dile Ndreca.
Banorë të vjetër të zonës të cilët mbajnë mend ngjarjen, thonë se Zefit i është zënë pritë nga forcat e Sigurimit të Shtetit, të cilët më pas e kanë ekzekutuar dhe varrosur në të njëjtin vend.
“Ndrec Mark Zefi ka qenë një antikomunist i flaktë. Ai e ka kundërshtuar regjimin e asaj kohe duke mos iu bindur në asnjë moment.Unë kam pas ruajtur bagëtitë në vendin ku është vrarë Ndrec Mark Zefi. Atë ditë në mëngjes dola nga shtëpia për të ruajtur bagëtitë, kur hasa në një pritë në rruge dhe më thanë është e ndaluar për të lëvizur. Më detyruan që të kthehem mbrapa. Pak orë më vonë kam dëgjuar të shtëna arme dhe në ato momente është qëlluar Ndrec Mark Zefi, pasi nuk pranoi të dorëzohej. Ai kishte dalë për pritur shokët me qëllim për të ikur jashtë shtetit, por ata e prenë në besë pasi nuk i erdhën. Kur kam shkuar të nesërmen tek toka që kam këtu sipër, pashë që e kishin vrarë forcat e Sigurimit të Shtetit dhe e kishin varrosur në të njëjtin vend”, thotë një banor i vjetër i Mërqisë.
Eshtrat e gjetura janë rivarrosur sërish, ndërsa sot familjarët pas 65-vitesh do ta dinë vendin ku prehet i afërmi i tyre. Si ky rast ka me qindra në vendin tonë, ndërsa eshtrat e shumë të pushkatuarve vijojnë të jenë të humbura. /tesheshi.com/
