LDK ka bërë lëvizjen e papritur por jo krejt të pamenduar, për të formuar një koalicion me AAK-në e të tjerë, si një rrugë për të rrëzuar përfundimisht qeverisjen “Kurti”, e cila vijon të funksionojë dhe pse e rrëzuar me mocion mosbesimi.
Në terma individualë, Isa Mustafa bëhet bashkë me Haradinajn për të “hequr qafe” Albin Kurtin. Kjo, pasi Mustafa i është drejtuar kupolësë së lartë të LKD-së, me kërkesën për këtë lëvizje të re politike me synim rikthimin në qeverisje me tjetër partner, duke marrë dhe miratimin për të vijuar më tej.
“Të nderuar anëtarë të Këshillit të Përgjithshëm,
Ju falënderoj për shprehjen e qëndrimit tuaj në letrën që ua përcolla më dt. 12 prill dhe plotësimin e saj më 13 prill 2020.
Kam nderin tu njoftoj se deri në përfundim të afatit të shprehjes së qëndrimit tuaj, sot më 14 prill 2020 në ora 16:00, në pyetjen e shtruar: A pajtoheni që LDK ta marrë mandatin për formimin e Qeverisë, në qoftë se ky mandat ofrohet duke ndjekur procedurat kushtetuese dhe të bëjë përpjekje të formojë Qeverinë në koalicion me AAK-në, Nisma SOCIALDEMOKRATE-AKR dhe komunitetet, nga 124 anëtarë aktual të Këshillit të Përgjithshëm të LDK-së janë përgjigjur 114 anëtarë të KP, prej tyre 108 janë shprehur për (po), 6 janë shprehur kundër (jo) dhe 10 nuk janë përgjigjur.
Në bazë të kësaj, si Kryetar i LDK-së konstatoj se ekziston vullneti i Këshillit të Përgjithshëm të Lidhjes Demokratike të Kosovës për marrjen e mandatit mbi bazën e ndjekjes së procedurave kushtetuese, për formimin e Qeverisë në një koalicion të mundshëm me AAK, Nisma SOCIALDEMOKRATE-AKR dhe partitë që përfaqësojnë komunitetet joshumicë në Kuvendin e Republikës së Kosovës
Me respekt,
Kryetari i LDK-së
Isa Mustafa”, thuhet në dokumentin e Mustafës.
