Fundviti ka sjellë ndryshime në qeverinë “Rama”, krejt të befasishme dhe të paparalajëmruara. Gent Cakaj nuk do jetë më ministri i Jashtëm në detyrë, pasi këtë post e mban, zyrtarisht vetë Rama, për shkak se Meta nuk ka pranuar ta dekretojë Cakajn.
Në vend të tij do jetë Olta Xhaçka. Ndërkohë që mbrojtja kalon te Niko Peleshi, i cili pra kthehet kështu në qeveri.
“Pas një periudhe intensive pune në kryesimin e OSBE si edhe punës së madhe me përkushtim e profesionalizëm të Gent Cakajt si ministër në detyrë, ky është momenti për t’ia kaluar bashkarisht stafetën Olta Xhaçkës që të kryejë detyrën e ministres për Europën dhe Punët e Jashtme”, theksoi i pari i qeverisë, që rezervoi një vlerësim për njeriun që aq shumë u kontestua nga opozita dhe mediat pranë saj.
“Dua ta falenderoj me mirënjohje Gentin jo vetëm për dinjitetin në kryerjen e detyrës së derisotme, po edhe për gatishmërinë e plotë për të vijuar përpjekjen e përbashkët, duke u rikthyer në kabinetin e kryeministrit. Ndërkohë Niko Peleshi do të drejtojë ministrinë e mbrojtjes”, shkroi Rama. /tesheshi.com/
