Koço Kokëdhima ka startuar sot atë që e quajti ‘lëvizje politike’ dhe e startoi një javë më parë në një intervistë tek Eni Vasili. Dhe këtë lëvizje, Kokëdhima e ka nisur në Sarandë, ku ka zhvilluar një takim me simpatizantë të tij. Kokëdhima tha se nisma e tij vjen nga nevoja për të hartuar një platformë reformimi të partisë që vjen nga brenda, anëtarësia e thjeshtë e partisë dhe që synon që të ndodhi me energjinë dhe vullnetin e kësaj anëtarësie. Por ditën e sotme, dega e PS-së në Himarë ka lëshuar një deklaratë ku thekson se asnjë anëtar i PS-së së Sarandës nuk do të jetë pjesë e kësaj lëvizje.
Por, Koëdhima ka deklaruar se ka një trembje të socialistëve të qytetit të Sarandës, për të mos marrë pjesë në këtë takim.
“Këto lloj shantazhesh nuk janë pozitive. Ato ushqehen nga mendësi totalitare, anti-demokratike, ushqehen nga mendësi berishiane, dhe këto nuk duhet të jenë”, tha Kokëdhima që shtoi se “socialistët në Sarandë këtu janë më familjarë me konceptet e mia sepse i kemi diskutuar për shumë vite”.
Në fakt, kjo lëvizje politike ka nisur që në korrik, kur ishte vendosur largimi i tij përfundimtar nga PS-ja dhe afrimi drejt një përpjekjeje me Ilir Metën, që të godasë pjesën më të “majme” të PS-së, Jugun e thellë, apo të ashtuquajturën “Zonë Operative Vlorë-Gjirokastër”.
Strukturat paralele të Koço Kokëdhimës, të krijuara prej tre vitesh e që po çmontohen me shumë vështirësi nga establishmenti lokal “i hedhur në det” nga “Beu i Jugut” tani do të rizgjohen për të qenë de fakto, mbështetja e LSI-së në zona ku “fara” e Ilir Metës nuk mbin dot, pasi atje nuk ia harrojnë aleancën me Berishën, por edhe “pjesën e Luanit” që ka marrë në pushtet. Kështu, në Gjirokastër, edhe pse Meta ka kreun e bashkisë, si pasojë e marrëveshjes me Ramën, gjirokastritët nuk e votojnë, megjithëse ka lidhur aleanca me faktorë lokalë, si ish-kryebashkiaku Flamur Bime që është bërë prefekt.
Shkurt, atë që nisën të bënin brenda PS-së, strukturat e Koëdhimës pritet të nisin një kryengritje brenda të majtës për të bërë të mundur dështimin e Edi Ramës. Duhet thënë se, Kokëdhima ende nuk e ka hequr nga duart “Albpetrolin” dhe pjesë të tjera të tortës që Edi Rama ia dha “pa hesap” në jug. Nuk është e rastësishme mbyllja e televizionit të tij për të mos harxhuar para, pasi po bëhet gati të shpenzojë për politikë. Por, mund të thuhet se Kokëdhima me Metën ka edhe një të përbashkët, janë të padëshirueshëm nga italianët. Kjo, pasi ambasadori amerikan Donald Lu e cilësoi Koçon një “politikan të korruptuar”.
Kokëdhima deklaroi para një javë se do të imitojë Donald Trump në lëvizjen e tij anti-establishment. Dhe sipas gjasave, kjo aleancë do të bëhet më publike gjatë zgjedhjeve të 2017-ës, ku LSI-ja do të kërkojë vota majtas për llogari të Kokëdhimës, i cili nuk mund të dalë dot si deputet i pavarur, ndaj i duhet një forcë politike. Dreka e famshme e korrikut ishte pikërisht paralajmërimi për një lëvizje të tillë, e cila do të ketë si synim që PS-ja e jugut të ndahet me një copë, pra me një deputet ose me dy. Dhe kjo nuk është pak, por nëse i shton Blushin…/tesheshi.com/
