Lëvizja BESA e përshëndet takimin e të shtunës në Pogradec, të organizuar nga kryeministri shqiptar, Edi Rama. Për BESËN le që ai takim nuk ka qenë i dështuar dhe i kotë, siç nuk ngurroi ta paraqesë kryetari i partisë shqiptarë në pushtet në Maqedoni, por – përkundrazi – takimi i Pogradecit është një ngjarje historike për shqiptarët e Maqedonisë. Kjo është hera e parë në historinë pluraliste 25-vjeçare të shqiptarëve në Maqedoni që një zyrtar kaq i lartë i Republikës së Shqipërisë i mbledh në një tavolinë kryetarët e të gjitha partive politike shqiptare në Maqedoni dhe, aq më shumë, kjo është hera e parë që shteti shqiptar, i përfaqësuar nga kryeministri, kryetari i Kuvendit dhe ministri i Jashtëm, inicion bashkëpunim konstruktiv të partive politike shqiptare në Maqedoni.
Me këtë rast Lëvizja BESA e informon opinionin se, sikur dy liderët e partive shqiptare në pushtet – BDI dhe PDSH, ta tejkalonin veten e tyre, të ishin ngritur mbi interesat e tyre të ngushta partiake e klanore, sot – kur po flitet për ridzajnimin ose, siç e kemi emërtuar ne, RIDEFINIMIN e Maqedonisë – shqiptarët e këtij vendi do të mund të dilnin me një qëndrim të unifikuar se cila është Maqedonia që ata e duan.
Sidoqoftë, BESA shpreson që shteti shqiptar edhe në të ardhmen do të vazhdojë të tregojë interes për popullin shqiptar në Maqedoni dhe për unifikimin e faktorit politik shqiptar këtu, ndërsa me këtë rast theksojmë se në këtë drejtim te Lëvizja BESA gjithnjë do të gjejë një partner të interesuar seriozisht për mbështetjen e shtetit shqiptar ndaj shqiptarëve të Maqedonisë.
