Me një gjuhë puro majtiste, kreu i Kuvendit Gramoz Ruçi u ka përcjellë një letër ish-partizanëve të Brigadës XX Sulmuese, në 75-vjetorin e themelimit të kësaj Brigade.
“Sot jam shpirtërisht në Protopapë, Maliq, Korçë, Pogradec, Elbasan, Librazhd, Zvezdë, Qafë-Thanë, Përrenjas, Domozdovë, në grykat e Xhyrës dhe kudo ku kanë luftuar e fituar parltizanët e Brigadës XX Sulmuese.
Brigada XX u formua në Protopapë, më 9 shtator 1944, prej bashkimit të batalionit të famshëm “Tomorri”, me batalionet e tjera që vepronin në këto krahina, si “Reshit Çollaku”, “Hakmarrja” , “Fuat Babani” dhe “Skënder Çaçi”, e nis letrën e tij Ruçi, në të cilën më pas haset një veneracion tipik komunist mbi luftën, shprehur në kohën e një denoncimi të anës së errët të saj, ku në krye qëndron shkrimtari Agron Tufa.
“Asaj iu bashkuan qindra vajza e djem të rinj nga Korça, Skrapari dhe Elbasani, të cilët formuan sëbashku këtë formacion partizan, të njohur për vitalitetin, trimërinë dhe heroizmin e pashoq. 1200 partizanët e Brigadës XX, siç shkruan historia e Luftës, nuk kanë në bilancin e tyre asnjë betejë të humbur.
Vetëm një ditë pas krijimit, më 10 nëntor 1944, partizanët e Brigadës XX hynë në Librazhdin e çliruar dhe një javë më vonë, më 17 nëntor, në Elbasanin e çliruar. Populli i Elbasanit, Librazhdit dhe gjithë krahinave të tyre do tu jetë mirënjohës përjetë vajzave e djemve të kësaj Brigade, të cilët i çliruan ato nga okupatori nazi-fashist dhe bashkëpunëtorët e tyre vendas.
Brigada XX ishte pjesë e uraganit të fuqishëm të Ushtrisë Nacional-Çlirimtare, e cila çliroi Shqipërinë nga pushtuesit nazi-fashistë dhe tradhëtarët vendas. Ushtria e partianëve shqiptarë luftoi denjësisht në krah të Ushtrisë së Shteteve të Bashkuara të Amerikës, Ushtrisë së Kuqe, Ushtrisë së Britanisë së Madhe, të Francës dhe vendeve të tjera të koalicionit antifashist. Ishin partizanët shqiptarë, këta kalorës të çlirimit e të lirisë, që e vendosën Shqipërinë në anën e drejtë të historisë, në krah të forcave antifashiste e çlirimtare”, shprehet njeriu që drejton Kuvendin e Shqipërisë.
Ndodh kjo, në kohën kur ai është një ndër figurat e mazhorancës së drejtuar nga Edi Rama, njeriu që në fillim të viteve ’90 hodhi tezën e Nacionalçlirimtares si luftë civile vëllavrasëse. /tesheshi.com/
