Presidenti Meta ka shfaqur një tjetër anë të protagonizmit të tij, kësaj here jo politik por social.
Duke iu referuar paralajmërimeve të një sizmiologu grek, kreu i shteti u ka drejtuar një letër krerëve të qeverisë, duke kërkuar prej tyre info lidhur me rastin.
“Të nderuar,
Nëpërmjet medias ndërkombëtare dhe kombëtare jam informuar mbi paralajmërimin për një tërmet apokaliptik që pritet të godasë Ballkanin. Paralajmërimi ka ardhur nga sizmiologu i njohur, zoti Akis Tselentis, drejtor i Institutit Gjeodinamik Obsarvatori Kombëtar i Athinës.
Sizmiologu Tselentis ka paralajmëruar për një tërmet apokaliptik që pritet të godasë Ballaknin, që mund të jetë 30 herë më i fuqishëm se ai që goditi para disa ditësh rajonin e Athinës.
Për shkak të karakteristikave të veta sizmike vendi ynë është një nga vendet me sizmicitetin më të lartë në Europë. Prandaj Shqipëria është një vend i kërcënuar nga kjo dukuri natyrore.
Për sa më sipër, kërkoj nga ana juaj të informohem mbi:
Institucionet përgjegjëse, a kanë kontaktuar me sizmiologun Tselentis dhe institucionet homologe të rajonit lidhur me të dhënat e tyre për paralajmërime të tilla?
Cilat janë kapacitetet tona për përballimin dhe masat e marra nga ana juaj, nëse vendi ynë do të goditet nga një tërmet i përmasave të tilla?
Çfarë masash janë marrë apo do të merren për të reaguar në kohë dhe për të minimizuar pasojat e mundshme në nivel qëndron dhe vendor?
Nëse e gjykoni të domosdoshme, jam i gatshëm të mbledh Këshillin e Sigurisë Kombëtare menjëherë qoftë dhe vetëm për këtë çështje, pasi çdo nënvlerësim i situatës mund të jetë me pasoja tragjike për jetën e qytetarëve në radhë të parë.
Presidenti i Republikës
Ilir Meta”, shkruan në letrën e tij Presidenti i Republikës.
Kjo letër e tij, në rolin e kreut të Sigurisë Kombëtare, vjen në kulmin e një protagonizmi jo të zakontë politik nga zyra e Presidencës, ku paralajmëron dhe tensione në rajon si pasojë e krizës shqiptare. Në gjykimin e tij, kriza zgjidhet me zgjedhje të trefishta më 13 tetor. /tesheshi.com/
