Krerët në të lartë të Brukselit; Donald Tusk, President i Këshillit Evropian, David Sassoli, President i Parlamentit Evropian, Jean-Claude Juncker, President në detyrë i Komisionit Evropian, si dhe Ursula von der Leyen, pasuese e këtij të fundit si Presidente në pritje e Komisionit Evropian, u kanë përcjellë një letër shteteve të Unionit, duke ju kërkuar hapjen e negociatave me Tiranën dhe Shkupin, vendim që pritet të merret pas 15 ditësh.
“Të dashur kolegë,
Qershorin e kaluar u pajtuam të arrinim një vendim të qartë dhe thelbësor për hapjen e negociatave të pranimit me Maqedoninë e Veriut dhe Shqipërinë jo më vonë se tetori 2019.
Bashkimi Evropian qëndron para një zgjedhjeje strategjike. Nëse BE vendos tani për të filluar bisedimet e pranimit me Maqedoninë e Veriut dhe Shqipërinë është një provë e aftësisë së Unionit për të përmbushur premtimet e saj dhe për të parë në të ardhmen” thuhet që në fillim të letrës, teksa më poshtë analizon arsyet e një “Po”-je në unison.
“Bota jonë po pëson ndryshime të shpejta. Nëse BE do të ruajë rolin e saj ndërkombëtar dhe të mbrojë interesat e saj, ndërmarrja e një hapi drejt integrimit të atyre vendeve evropiane që kanë shprehur interes dhe kanë përmbushur kërkesat për fillimin e procesit të pranimit do të ndihmojë në arritjen e kësaj”, thuhet në letër.
Aty potencohet gjithashtu fakti se të dy vendet i kanë plotësuar obligimet e tyre.
“Maqedonia e Veriut dhe Shqipëria bënë atë që u kërkuam të bënin. Arritja e kësaj kërkonte një përpjekje të konsiderueshme nga qytetarët e tyre, për të cilët perspektiva evropiane ka qenë një burim i shkëlqyeshëm i motivimit dhe vendosmërisë.
Nuk ka asnjë garanci për sukses. Do të ketë shumë punë të vështirë për reformat gjatë rrugës. Anëtarësimi nuk do të ndodhë brenda natës. Dhe të dy vendet janë të vetëdijshme për këtë. Paralelisht, bashkëpunimi i BE-së do të duhet të thellohet për të ecur së bashku me zgjerimin, në interesin e ndërsjellë të qytetarëve të vendeve evropiane dhe ato kandidate.
Ne besojmë se tani është koha për të hapur bisedimet e pranimit me të dy vendet”, përfundon letra e krerëve të BE për vendet anëtare. /tesheshi.com/
