Qindra artistë dhe intelektualë izraelitë, në një letër të hapur u kanë bërë thirrje hebrenjve të botës që të kritikojnë politikat izraelite ndaj palestinezëve.
“Ne u bëjmë thirrje hebrenjve anembanë botës që t’i bashkohen partnerëve izraelitë në veprime të koordinuara për t’i dhënë fund okupimit dhe për të ndërtuar një të ardhme të re, në emër të shtetit të Izraelit dhe brezave që do të vijnë”, thuhet në letër.
Midis 470 nënshkruesve janë 48 fitues të çmimeve më prestigjioze të Izraelit (Çmimi i Izraelit dhe Çmimi EMET), shtatë oficerë të lartë të IDF-së, njëzet ish-ambasadorë izraelitë, ministra, zyrtarë të lartë të qeverisë dhe anëtarë të Knesset-it, dhe 160 profesorë nga universitetet izraelite.
Ndër nënshkruesit më të shquar janë autorët David Grossman dhe Amos Oz, laureati i Nobelit Daniel Kahneman dhe 20 ish-ambasadorë izraelitë.
“Okupimi i zgjatur është në thelb shtypës për palestinezët dhe inkurajon gjakderdhjen reciproke. Ai minon strukturën morale dhe demokratike të shtetit të Izraelit dhe dëmton pozitën e tij në bashkësinë e kombeve,” thuhej në letër.
Organizata “Save Israel, Stop Occupation” synon t’i japë fund kontrollit izraelit mbi territoret që pushtoi gjatë Luftës Gjashtë-ditore në qershor 1967 dhe të krijojë një shtet palestinez. Këto territore tani përfshijnë Bregun Perëndimor dhe Jerusalemin Lindor.
Drejtoresha e organizatës, Jessica Montell, tha se sundimi ushtarak izraelit “dëmton shoqërinë izraelite dhe dëmton hebrenjtë në mbarë botën”.
Izraeli filloi ndërtimin e vendbanimeve në Bregun Perëndimor pasi pushtoi territorin e kontrolluar më parë nga Jordania në Luftën Gjashtë Ditore të vitit 1967. Sot, mbi 350,000 izraelitë jetojnë në vendbanime dhe poste në Bregun Perëndimor dhe 200,000 të tjerë në Jerusalemin Lindor, të cilin Izraeli e konsideron si pjesë të territorit të tij. /tesheshi.com/
