Drama e sirianëve shpërfaqet hapur në këtë amanet të lënë nga një vajzë refugjate siriane. Ja ç’shkruan ajo në letrën e fundit të saj:
“E dashur nënë, dua t’i kujtosh buzëqeshjet e mia të bukura, e të ma lësh shtratin siç është. Dhe ti motër! Tregoju shoqeve të mia se vdiqa nga uria. E ti vëlla, mos u mërzit për mua.”
Letra vijon e bëhet më prekëse: “Ej, engjëll i vdekjes! Nxito dhe ma merr shpirtin, në xhennet të ha ushqim. Jam shumë e uritur. Ej, familja ime! Mos u frikësoni për mua. Kam për të ngrënë për ju sa të mundem në xhennet.”
Fëmijët janë më të prekurit nga lufta shkatërrimtare në Siri, që sa vjen e bëhet më e tmerrshme. Pamjet e të voglit sirian Ajlan Kurdi, të cilin deti e nxori në bregun turk në fillim të shtatorit, bënë xhiron e botës, për të nxitur më pas një valë solidariteti.
Vërshimi i refugjatëve sirianë drejt Europës sjell bashkë me ta dhe mijëra fëmijë që kanë lënë lodrat, ëndrrat, në kërkim të shpëtimit nga një makth pa fund.
E ndërsa ditët kalojnë, tragjedia siriane i mbërthen më fort të vegjlit. Vetëm në fillim të kësaj jave u mbytën një numër fëmijësh sirianë. Nuk janë as të parët, as të fundit, siç nuk është kjo vajzë e cila shkroi letrën e fundit para se të vdiste nga uria.
Vizatimi i pafajshëm që e shoqëron këtë lajm është bërë nga dora e një fëmije, që ka skicuar veten brenda një qivuri… /tesheshi.com/
