BBC botoi një letër nga Aida Cerkez, e cila ndau përvojat e saj me ukrainasit nga Sarajeva e rrethuar, me shpresën se kjo do t’i motivonte më tej ata të mbijetonin në kohët e vështira që po i ekspozohen.
Aida Cerkez ka punuar për Associated Press në Sarajevë që nga viti 1992, fillimisht si prezantuese dhe më pas si reportere.
Kjo është letra e saj drejtuar ukrainasve.
“Të dashur miq, organizatat humanitare këtu në Sarajevë po mbledhin ndihma për ju. Unë jam ulur në banesën time duke u përpjekur të kujtoj se çfarë do t’ju nevojitet më shumë.
Jo çorapet e mia të ngrohta, apo xhaketa, apo çizmet e mia…nuk janë ato që ju duhen më shumë tani, por bluza ime 30-vjeçare me një slogan të printuar që më zgjati 1425 ditë gjatë së cilës serbët e Bosnjës granatuan dhe rrethuan qytetin tim. Pa ujë, ushqim, rrymë, ngrohje dhe pa komunikim me botën e jashtme. E vesha atë bluzë dhe lexova mesazhin e shkruar teksa më shumë se dy milionë granata ranë mbi kokat tona dhe ndërsa u shmanga plumbave të panumërt. Në bluzë shkruhet: “Sarajeva do të jetë, gjithçka tjetër do të kalojë”.
Ju presin kohë të këqija miqtë e mi, por ju dërgojnë armë që të mbroni veten. Ne boshnjakët u mbrojtëm, por bota na vendosi një embargo armësh. Ajo nuk e kuptoi pse lufta po bëhej në Sarajevë. Falë Zotit, e kupton tani në Kiev.
Do të jeni të uritur, të etur, të mërdhirë dhe të pistë, do të humbni shtëpitë, miqtë dhe anëtarët e familjes, por ajo që do t’ju lëndojë më shumë do të jenë gënjeshtrat. Gënjeshtra, se ju jeni përgjegjës për atë që ju ndodh e të tjera. Këto gënjeshtra do të bëjnë vrima të panumërta në zemrat tuaja, por pa i ndalur rrahjet e tyre.
Unë shoh se ata shkatërruan kullën tuaj televizive. Ata duan t’ju mbajnë në errësirë, ashtu siç na mbajtën ne në errësirë. Ata duan të fikin dritën, kështu që ne mos shohim se çfarë po ju bëjnë. Ju regjistroni dhe regjistroni gjithçka. Një ditë ato do të përcaktojnë historinë tuaj, do t’u shpjegojnë ukrainasve që nuk kanë lindur ende se çfarë ndodhi dhe, me shumë mundësi do të përdoren si provë në gjykatë kundër atyre që përpiqen t’ju vrasin.
Në kohët e errëta që keni përpara, herë pas here do të humbni shpresën, por unë po ju shkruaj nga e kaluara dhe po ju them: do të mbijetoni, ashtu siç mbijetuam dhe ne, sepse po shoh tek ju të njëjtën rezistencë që pashë këtu.
Unë ju dëgjoj duke kënduar himnin tuaj ndërsa zmbrapsët tanket me duar të zhveshura. Me kalimin e kohës, do të këndoni këngë të reja për guximin tuaj gjatë këtij telashi dhe do të dilni me sloganin tuaj që do t’ju mbajë gjallë. Tani për tani po ju dërgoj gjënë më të çmuar që kam, sloganin tim, pak të përshtatur për ju: ‘Ukraina do të jetë, gjithçka tjetër do të kalojë’”, përfundon mesazhi i Aida Cerkez. /tesheshi.com/
