Munira Subashiç, kryetare e shoqatës së nënave të enklavës së Srebrenicës dhe Zhepës, i dërgoi një letër nobelistes, e ashtëquajtur “e turpit” këto kohë, Aung San Suu Kyi, udhëheqëses së Myanmar-it, në lidhje me persekutimin e popullit Rohingya.
Letra e hapur:
E nderuara Aung San Suu Kyi,
Po ju drejtohem si nënë e Srebrenicës dhe një luftëtare e së vërtetës dhe së drejtës, dhe si një grua që ka humbur më shumë se 22 anëtarë të familjes gjatë genocidit të kryer në Srebrenicë. Unë ju drejtohem në emër të drejtësisë dhe me shpresën që ju do ta kuptoni apelin tim si një britmë të një nëne që nuk dëshiron që një fëmijë të vritet vetëm sepse quhet ndryshe dhe i përket një feje tjetër.
Unë besoj se ju jeni të njohur me luftën në Bosnje gjatë viteve 1992-1995 dhe genocidin në Srebrenicë, dhe se keni parë imazhe dhe përndjekje të të pafajshmëve, sidomos grave dhe fëmijëve, dhe atyre që u vranë. Jo vetëm që e kujtoj këtë vuajtje çdo ditë, por unë kam mbijetuar dhe besoj se kam mbetur gjallë për të kërkuar të vërtetën dhe drejtësinë për viktimat. Këto javë të fundit, këto imazhe janë bërë përsëri ankth imi, sepse në vendin tuaj, njerëz të pafajshëm, myslimanë Rohingya, janë duke u persekutuar dhe duke u vrarë. Vuajtja e tyre dhe dhimbja që depërton në ekranet tona televizive është e papërshkrueshme për ne që kemi kaluar nëpër të njëjtën dhembje, e cila godet direkt në plagët tona.
Ju, si një nënë dhe fituese e çmimit Nobel, duhet ta dini se për çdo jetë, e sidomos të një fëmije, ia vlen të luftohet pa ndonjë përfitim politik dhe pa miratimin e çfarëdo partie politike. Zëri juaj ishte i zëshëm për luftën demokratike të shtetit tuaj, sot ai duhet të jetë më i fuqishëm kundër persekutimit, vrasjes, spastrimit etnik dhe gjenocidit ndaj myslimanëve Rohingya. Unë ju bëj thirrje që të bëni gjithçka që është në fuqinë tuaj për të ndaluar persekutimin dhe vrasjen e njerëzve të pafajshëm, për t’u mundësuar atyre paqe dhe liri për të jetuar si bashkëqytetarë tuaj.
Është koha që ta justifikoni çmimin Nobel, sepse njeriu vlerësohet për veprat e tij të mira, parimet dhe besimin e tij në këso raste të vështira, e jo në kohë paqeje.
Me këtë apel, i bëj thirrje qeverisë suaj dhe bashkësisë ndërkombëtare që të parandaloni vrasjen dhe vuajtjen e myslimanëve Rohingya. Ne nuk guxojmë t’i lejojmë vetes që të shkatërrojmë këtë pak dinjitet që na ka mbetur.
Me një zemër të rënduar, Munira Subashiç, Presidente e Lëvizjes së Nënave të enklavës së Srebrenicës dhe Zhepës.
Përgatiti Jeton Zenuni – /tesheshi.com/
