Lënia në harresë të plotë e banesës ku ka jetuar kollosi i letrave shqipe, At Gjergj Fishta; e cila është kthyer në një gërmadhë, ka bërë që ish-përgjegjësi i Kulturës Kombëtare në Lezhë, Paulin Zefi t’u dërgojë një leter të hapur krerëve më të lartë të shtetit Shqiptar.
Nëpëmjet kësaj letre, Zefi ju kërkon ndërhyrje të menjëhershme strukturave shtetërore që t’i hapin rrugë projektit të restaurimit të shtëpisë së Fishtës. Letra i është drejtuar presidenti Nishani; kryeministrit, Rama; kryetarit të Kuvendit, Meta; si dhe Ministres së Kulturës, Mirela Kumbaro.
“Jam i detyruar që të kërkoj ndihmën tuaj në lidhje me një çështje delikate e cila mbart një rëndësi shumë të veçantë me përmasa mbarëkombëtare që konkretisht ka të bëjë me valorizimin e figurës emblematike të të madhit At Gjergj Fishta, ndaj të cilit çdo shqiptar e ka si obligim moral për të kontribuar, edhe duke tejkaluar mundësitë e tij… Varri i Fishtës brenda Kishës Françeskane rënkon krejtësisht i zbrazur nga eshtrat e tij, të cilat ose janë hedhur në lumin Buna ose prehen dhunshëm diku tek selvia nr.4. pas Kishës Mortore tek varrezat e Rrmajit. Shtëpia ku jetuar Fishta ka kaluar në mbrojtje paraprake me dt.07.05.1991 dhe është shpallur si monument-kulture i kategorise së II-të. Braktisja afatgjatë e kësaj shtëpie, mungesa e plotë e ndërhyrjeve restauruese për mirëmbajtjen e saj të vazhdueshme dhe shumë faktorë të tjerë, kanë shkaktuar amortizimin e saj të tejskajshëm. Prandaj ka disa vite që rrezikon shembjen e plotë ku gjendja fizike e këtij objekti është jashtëzakonisht alarmante. Amortizimi i kësaj shtëpie ka ardhur si rezultat i braktisjes dhe i pamundësive financiare nga ana e pronarëve të saj, por sidomos nga neglizhenca totale e institucioneve shteterore kompetente që nga viti 1991 e deri më sot. Gjithsesi shpresoj dhe besoj që këto detaje të turpshme të mbeten prapa në kohë dhe nëpërmjet ndërhyrjes tuaj konkrete, duhet që të materializohet me çdo kusht një ndërhyrje sa më emergjente për konsolidimin dhe restaurimin e plotë të këtij objekti i cili përfaqson dëshminë e vetme materiale nga jeta e At Gjergj Fishtës”, thuhet ndër të tjera në letrën e Zefit
Më tej, ai thotë se pikërisht më 23 tetor 2016 e cila përkon me 145-vjetorin e lindjes së poetit dhe rilindasit, të jetë kjo dhe data e inaugurimit të përfundimit të plotë të proçesit restaurues të kësaj shtëpie. A. Zani – /tesheshi.com/
