Lestër Siti arriti ta përballojë mjaft mirë presionin pas barazimit të Totenhemit të shtunën ndaj Liverpulit, dhe ia doli të fitojë ndaj Sauthemptonit mesditën e së dielës.
Kjo ishte fitorja e katërt radhazi e Lestërit, dhe të katër takimet janë fituar me rezultatin e ngushtë 1-0.
“Ne përpiqemi të bëjmë më të mirën. Ekipet e tjera mund të fitojnë 3-0 apo 4-0. Ne duhet të luftojmë për të fituar 1-0,” ka deklaruar Ranieri, trajneri italian, pas ndeshjes.
Fitorja ndaj Sauthemptonit e ka çuar në shtatë pikë diferencën e Lestërit me Totenhemin e vendit të dytë.
I kënaqur me lojtarët e tij, Ranieri ka shtuar, “E rëndësishme është mënyra si ne reagojmë, si luajmë. Kjo është ajo çka dua prej tyre. Jam i lumtur kur ata më japin gjithçka, zemrën e shpirtin.”
Nga gjashtë ndeshjet e mbetura, Lestërit i mjaftojnë 12 pikë për t’u shpallur kampion, ndërsa pjesëmarrja në Champions League sezonin e ardhshëm mund të sigurohet më herët.
“Ne besojmë se është një sezon magjik,” ka vijuar Ranieri. “Ne besojmë se sezoni tjetër nuk do të jetë njëlloj, prandaj përpiqemi të bëjmë më të mirën.”
Lestëri luan të dielën që vjen në fushën e Sandërlendit, kurse Totenhemi, ndjekësi më i afërt, pret Mançester Junajtedin në të njëjtën ditë. /tesheshi.com/
