Skuadra surprizë e kampionatit anglez, Lestër Siti, arriti sot fitoren e 16-të në 27 javë, duke vazhduar ta kryesojë bindshëm klasifikimin.
Lestëri priti në shtëpi Noruiç Sitin, e fitoi 1-0 në prani të mbi 32 mijë shikuesve. Ndeshja nuk rezultoi aq e thjeshtë sa ç’mendohej. Miqtë rezistuan fort, dhe me pak fat mund të ishin ndarë edhe me një pikë.
Goli për vendasit erdhi vetëm pak çaste para mbarimit të 90 minutave. Atë e shënoi Ulloa, i cili do të futej në lojë në çerekorëshin e fundit.
Lestëri ngjitet në kuotën e 56 pikëve me këtë fitore, duke vijuar të jetë pretendenti kryesor për ta fituar Premier League-n. Totenhemi i vendit të dytë ka pesë pikë më pak, e do ta zhvillojë nesër ndeshjen e tij të kësaj jave.
Në Bundesligë, Bajernin e Mynihut nuk e ndal as Volfsburgu. Takimi në “Volkswagen Arena” u mbyll këtë pasdite 0-2, me golat të realizuar nga Coman dhe Lewandowski për bavarezët. Loja në dy të tretat e saj qe e
zotëruar prej miqve, që i zhbllokuan shifrat në pjesën e dytë.
Fitorja e sotme thjesht e thellon mbretërimin e Bajernit në kampionatin gjerman, duke mos njohur rivalë. 62 pikët e 20 fitoret flasin vetë për epërsinë e thellë të skuadrës më të mirë gjermane, e cila ka barazuar vetëm në dy takime e ka humbur në një të tillë gjatë gjithë këtij kampionati. /tesheshi.com/
