Komentet e Lionel Mesit në Kupën e Amerikës kanë sjellë për të një dënim tremujor si lojtar i Argjentinës, që do ta lënë atë jashtë miqësoreve të shtatorit dhe tetorit ndaj Kilit, Meksikës dhe Gjermanisë.
Kapiteni i Argjentinës ka shtatë ditë kohë për ta apeluar vendimin e CONMEBOL-it, Konfederatës Amerikanojugore të Futbollit, i gjobitur gjithashtu dhe me një shumë prej 50.000 dollarësh.
Mesi do të reagonte pas eliminimit të Argjentinës nga Brazili në gjysmëfinalen e Kupës së Amerikës, dukshëm i pakënaqur me gjykimin e arbitrave të asaj ndeshjeje.
Ai foli për korrupsion dhe për gabime të qëllimshme të gjyqtarëve, pasi u nxor dhe nga loja me të kuqe në ndeshjen pasardhëse ndaj Kilit.
CONMEBOL i cilësoi si mungesë respekti akuzat që vunë në diskutim integritetin e Kupës së Amerikës. /tesheshi.com/
