Presidenti Thaçi paralajmëroi se do mandatojë për një qeveri të re të Kosovës atë parti e cila siguroin një shumicë në parlament, kuptohet duke bërë koalicion me një tjetër.
Pas një takimi me krerë të forcave politike, ku veç Vetëvendosjes të giitha të tjera qenë kundër shkuarjes dhe njëherë në zgjedhje, Thaçi tha se “si rrjedhojë e vullnetit tuaj që vendi të ketë qeveri të re të dalë nga zgjedhjet e 6 tetorit, duke respektuar në tërësi dhe përpikëri Kushtetutën e Republikës së Kosovës, ligjet e Kosovës, do t’i jap mandatarin cilësdo parti që dëshmon se ka shumicën në Kuvend për të formuar qeverinë e re”, ka thënë ai.
Siç dihet, paralajmërimin për koalicion e ka bërë LDK, pas ndarjes me VV-në, e cila u renditet e dyta në zgjedhjet e 6 tetorit me një votë më pak se Vetëvendosja. Ajo ka dhënë të kuptuar se do bëjë koalicion me AAK-në dhe NISMA-n.
Nga ana tjetër, Albin Kurti i rrëzuar me mocion mosbesimi, ende në detyrë, reagoi duke thënë se Thaçi nuk mund ta ndërmarrë këtë hap, pasi në gjykimin e tij, VV nuk e ka refuzuar zgjedhjet e një mandatari tjetër.\
“Kushtetuta e Republikës nuk parasheh një kompetencë të tillë të Presidentit për të vlerësuar apo konstatuar shfrytëzimin apo mosshfrytëzimin e të drejtës për të propozuar mandatarin. Përveç kësaj, Kushtetuta e as Aktgjykimi Nr. 103/14 nuk kanë përcaktuar as afatin për një gjë të tillë. Kushtetuta çfarë parasheh në këtë rast është caktimi i mandatarit vetëm pas propozimit nga partia ose koalicioni që ka fituar shumicën absolute apo relative, siç përcaktohet edhe në pikën 84 të Aktgjykimit të Gjykatës Kushtetuese.
Andaj, bazuar në rolin dhe funksionin si President, ju nuk keni të drejtë e as autorizim kushtetues për të konstatuar se kemi refuzuar propozimin e kandidatit për kryeministër kur nuk e kemi bërë këtë; ju nuk e keni në mandat e kompetencë që të përcaktoni përtej Kushtetutës se si e çfarë do të jetë Qeveria, siç keni bërë këtyre ditëve në deklarimet publike; dhe, me keqardhje konstatojmë se ende nuk na jeni përgjigjur se në bazë të cilës pikë të nenit 95 po veproni dhe po na drejtoheni”, i shkroi Kurti në një letër. /tesheshi.com/
