Kryetari i Bashkisë Kamëz, pranë Tiranës, Xhelal Mziu është paditur penalisht nga Inspektoriati Kombëtar i Mbrojtjes së Territorit.
Sipas IKMT, kryebashkiaku i Kamzës është bërë pengesë për prishjen e 89 objekteve pa leje, që kishin vendim prishje.
“Në ushtrim të kompetencave ligjore, gjatë kontrollit në IMT e Kamzës janë gjetur një sërë shkeljesh që lidhen me mosveprimet e kreut te bashkisë”, thuhet në njoftimin e IKMT.
Por Bashkia e Kamzës, e cila drejtohet nga Partia Demokratike në opozitë, e konsideron sulm të kryeministrit Edi Rama këtë kallëzim.
Me anë të një deklarate, Mziu thotë se qeveria lejoi ndërtimet pa leje në këmbim të votës.
“Ky kallëzim është i paralajmëruar para zgjedhjeve parlamentare nga Kryeministri. Fluksi i ndërtimeve pa leje dhe i klientelës me flamujt e qeverisë qendrore vazhdoi në gjithë Shqipërinë, në këmbim të votës. Kjo ka ndodhur edhe në Kamzë, gjë të cilën e kam pohuar që është ndërtuar ilegalisht me flamujt e qeverisë. Por ndonëse në Kamzë është ndërtuar për mbijetesë për të futur kokën, në Tiranë, Durrës, Elbasan dhe bashki të tjera, është ndërtuar dhe po ndërtohet pa leje, jo vetëm shtëpi, por edhe vila, pallate e madje edhe në prona publike me paratë e krimit, korrupsionit dhe drogës”, thuhet në njoftim.
Më tej thuhet se Bashkia Kamzë ka ndërmarrë të gjithë hapat ligjorë për parandalimin apo penalizmin e çdo ndërtimi pa leje.
“Kallëzimi penal ndaj Bashkisë Kamëz nuk është gjë tjetër veçse një hakmarrje e pastër politike”, përfundon reagimi.
Beteja me ndërtimet pa leje ka çuar në shkrirje totale dy inspektoriate lokale, pasi janë larguar nga detyra inspektorët e IKMT për Shkodrën e Lezhën.
Firmosja e shkarkimit është bërë për përgjegjësit e degës dhe 6 inspektorëve pasi kanë neglizhuar detyrën për inspektimin e ndërtimeve pa leje.
Inspektorë nga Tirana do të ndërmarrin veprime në Velipojë dhe më gjerë./tesheshi.com/
