Julian Assange, i cili prej vitesh jeton i ngujuar në ambasadën ekuadoriane në kryeqytetin britanik, do të mund të intervistohet nga autoritetet suedeze.
Marrëveshja është arritur një ditë më parë, ndërsa Suedia kishte bërë një kërkesë zyrtare në qershor për intervistimin e Assange-it në ambasadën e Ekuadorit në Londër. Përcaktues për marrëveshjen ishte miratimi i kërkesës suedeze nga prokurori i përgjithshëm i Ekuadorit.
Një njoftim i Ministrisë së Jashtme të Ekuadorit thotë mes të tjerash se, “Në javët e ardhshme do të vendoset një datë për procedimet që do të bëhen në Ambasadën e Ekuadorit në Mbretërinë e Bashkuar.”
Assange, themeluesi i Wikileaks-it, jeton prej katër vitesh në ndërtesën e ambasadës së Ekuadorit në Londër, ku i është dhënë azil me kërkesën e tij nga frika e një ekstradimi të mundshëm për në Suedi e, më tutje, në SHBA.
I kërkuar për një hetim në vazhdim për një aferë seksuale, Assange druhet se do të ekstradohet nga Suedia në Shtetet e Bashkuara për t’u hetuar për aktivitetet e Wikileaks-it. /tesheshi.com/
