Leicester City ka dhënë një provë tjetër në Premier League, duke treguar se është realisht ekipi më i konsoliduar.
Djemtë r Raniarit kanë bërë një tjetër hap të madh drejt titullit kampion duke fituar jashtë fushës ndaj Sunderland me rezultatin 2-0.
Jamie Vardy shënoi dy gola dhe tani Leicester shkëputet me 10 pikë nga ndjekësi më i parë që është Tottenham.
Jamie Vardy nuk kishte shënuar që prej muajit shkurt, por lojtari u zhbllokua në një ndeshje vendimtare, pasi Sunderland kërkonte dëshpërimisht 3 pikët që do ta ndihmonin në luftën për mbijetesë.
Goli i parë i ndeshjes u shënua në minutën e 66, kur Drinkwater shërben Vardyn i cili kaloi një mbrojtës dhe shënoi për 0-1. Vendasit kishin disa raste të mira për barazim, por në minutat e fundit, sulmuesi i kombëtares angleze kalon bukur dy mbrojtës dhe porterin për të shënuar edhe golin e dytë.
Leicester nuk ka pësuar gol prej 5 javësh duke vendosur një rekord të ri për skuadrën. Dy ndeshjet e ardhshme, “dhelprat” i luajnë në shtëpi . Fillimisht do të mirëpresin skuadrën londineze të West Ham, ndërsa më pas uellsianët e Swansea.
/tesheshi.com/
